• August 19th, 2019
Login / Register

Nangeleni komauta… ope na okaRun X kookalyongo



ONGWEDIVA - Opolifi moshitukulwa shaShana oi li molukongo tai kongo ovalumenhu taku fekelwa kutya ovo va ninga omunyeka kwa homatiwa, nokufaduka po noimaliwa mOshakati, Ongwediva nOndangwa.

Oonakunyeka ovo alushe vati ohava nukile mokatuwa kokaToyota Run-X oko haka kala kehe na onomola.
Ongula inene yEtitano okatuwa oko tuu oko, oka oka nyeka oimaliwa ihapu mocashloan mOshakati, nokukufa mo omuvalu munene woimaliwa, noukalata veembaanga veekastoma.

Deputy Commissioner Hilya Haipumbu okwa koleka omunyeka ou, ta ti oovanailonga kongeshefa oko tuu oko opo ve lipyakidila nomavalulo okutala kutya ova kanifa oshimaliwa shi fike peni. 

Ta ti mEtine loshivike sha dja ko okatuwa oko tuu oko natango oka ninga omunyeka mOndangwa omo va denga otuwa yomunangeshefa umwe omakende, manga ashike a li ta fikameke otuwa pombaanga ngeno a ka pungule oimaliwa yaye. 

“Manga ashike otuwa tai xungile, nokukanghama inai kanghama, omunangeshefa ou okwa mona ashike nale e li koshi yomakende, omakende otuwa aye a dengwa mo nale. Tave mu nyekula oimaliwa, nokunhukila mokaRun-X  kavo omo,” Haipumbu ta ti. 

Moshingingwanima eshi sha xuuninwa, sha ningilwa pongeshefa yedina Ombili Cashloan oyo i li popepi noWaltons mOshakati, natango eembudi edi oda longifa nokaRun-X oko tuu oko.

Otaku hokololwa ovalumenhu vatatu ve liteela mongeshefa oyo yocashloan nokunyeka mo noshimaliwa keemuma taku fekelwa shi dulife poN$100 000. Eshi tashi denge unene pomutima oshe shi ovanhu ava va ya noukalata vombaanga vomuvalu uhe shivike neePIN davo. Nonande kashi li vali paveta, natango onghene ngoo eecashloan dimwe tadi kufa ko oukalata vombaanga keecustoma davo odo da ehela oimaliwa kuvo. Eshi osha fa nee osho sha ningwa pOmbili cash loan.

Otaku hokololwa kutya konima yomunyeka ovalumenhu ava vatatu ova nhukila nokufaduka po nokatuwa koluvala lisilver okaRunX kehe na eenomola.

 Haipumbu okwa pula oshiwana opo shi lopotele opolifi ngeenge oshi na po ouyelele u na sha nominyeka odo. 


Staff Reporter
2019-07-22 11:33:57 28 days ago

Be the first to post a comment...

You might also like...