Home / NBC, One Africa Kazena Otjimbere Otjinamwinyo NBC, One Africa Kazena Otjimbere Otjinamwinyo
"I Carlos Kambaekua OTJOMUISE Ovasuvere votjimbere kavena kuyenena okutarera mo tiivii yo NBC po yo One Africa ekondua oritja 26 rematanaukiro omaseinina wEkopi rOviwana vya Africa ndumaryutu Osondaha mo Ghana. Nganduu tjipeya oveta ndjimaitie kutja omanyando tjiva, nu tjinene otjimbere, tjiraisiwe momirari mbihina otjimariva nawa, ovasuvere votjimbere mbehina ozondjatu ozosose maveihamwa mena rokutja omirari vyo monganda virarakana kuna omirari mbikaendera kotjimariva. Posya o New Era yazuu kutja o Supersport maraisa omahore ayehe yekopi indi omanamwinyo. Wina omirari vyo tjiwana kavina kukara nomasorero moku kondja okumuna ousemba womaraisiro womanyando omanene mena rokutja owo mouye yarira osirikusa yovanamangete nomangete. Omurari womonganda imbwi o One Africa ombwari ondjahe ondenga tjiuhina wa yenenene okuworonganisa otjimariva tjokuranda ousemba wokuraisa omahore inga omanawinyo tjitjitei pozondola za Namibia omangete yevari. Orutu nduungurira okuza mehi rOvafransose, o Sports Five Network, onduamuna ousemba aruyerike wokuraisa omahore wekopi indi ombura indji nganduu mo 2016. Munao otjiruhina maa ru kara nondero yokurandisa ousemba waro imbwi ombiriha tjinga runingira ozondola za Namibia omangete omurongo okuraisa omahore ayehe o 56 omanamwinyo oure wo viveke vitatu womahore inga. Omupitise Ohongora Omutize wOruveze wo NBC, Sackey Shikufa, wazeuparisire kOrupa rOmanyando ro New Era kutja o NBC unouzeu wo kuworonganisa otjimariva ihi. ""Tukara momatiasaneno kuna o Sports Five Network okuza kombunra ndjazuko posyo onganda indji yakukutisa osengo ohunga notjimariva otjihengo ihi. Nandarire ongondjero yetu kutja nani turaisa omahore inga worupa rwa Namibia onganda indji kaa inuka eyuru motjina ihi amaipandere pokurandisa otjina otjiputuputu uriri."" O tiivii ya Angola ondjayenenisa otjimariva ihi ngunda indji oya Zambia aihiyayenenisa. "
Your experience on this site will be improved by allowing cookies.
