Home / Nedbank A Gandja Ookompiuta 20 kOosikola moNooli Nedbank A Gandja Ookompiuta 20 kOosikola moNooli
"ONDANGWA Ombaanga Nedbank oya gandja omagano gookompiuta 20 dhongushu yokapandi koodola N$75 000 koosikola ne ongoshitopolwa shombaanga ndjika ketameko lyooproholama dhomadheulo ge nasha nomaunongo mookompiuta oshowo uutekenika womauyelele kaanona manga ye li mepupi egundjuka lela. Omukuluntuwiliki goNedbank e nasha nOmangeshefo oshowo Omakwatathano noshigwana, Pangwa Gabriel okwa tseyitha poshituthi shegandjo lyomagano ngoka puShinime Iimvula Primary School mOndangwa kutya okugandja sha shomiiyemo yawo koshigwana oshi li oshinakugwanithwa shopankalathano kombaanga ndjika okulongitha oonzo dhayo melongo. ""Tse otwa hala aanona ya mone ompito yokwiilonga okompiuta oshowo omaunongo guutekenika womauyelele manga ye li mepupi egundjuka lela opo ngele ya ka pita osikola itashi ka pumbiwa we yi ilonge omaunongo ngaka gopetameko."" Gabriel oku na eitaalo kutya aanongekwa otaya ka longitha ookompiuta dhika momalalakano ogendji ngaashi okuninga omapekapeko goowino dhontumba, iilongwa yawo, omakwatathano oshowo iikwawo yilwe. Kakele komagano ngoka kosikola Shinime Iimvula Primary School, oshi li wo endhindhiliko lyolupandu kombaanga ndjika, molwashoka sho ya tamekele momumvo 1993, enongelo ndika ollya ningi limwe lyomiiputudhilo yelongo mbyoka ya patulula okambo kombaanga moNedbank. ""Sho twa kala tatu tedha kutya olye ta vulu okumona omauwanawa okuza moshiketha shopankalathano mOndangwa nomudhingoloko, osha kala oshidhigu kutse oshoka osikola ndjika oyo yotango ya ninga okasitoma yetu. Omolwonkalo ndjika otwa tokola okugandja sha shomiiyemo yetu kosikola ndjika."" Gabriel okwa holola wo kutya omagano ngaka koosikola oge li shimwe shomiinima iiwanawa tayi ka landula ko okuungaunga nonkalo yokwaanuuthikepamwe kwa etwa konakuziwa oku shi talela momaunongo mokompiuta oshowo uutekenika womauyelele. Nedbank oku na opulana okugandja sha koshigwana miitopolwa moka ha mono iiyemo. Omukuluntusikola puShinime Iimvula Primary School, Victoria Nashongo okwa pupula kombunda oNedbank omolwomagano ngaka, ta ti ookompiuta odhe ya pethimbo ndyoka dha pumbiwa unene noonkondo. Omanga omagano ngaka inaga gandjwa kosikola, enongelo ndika olya kala ashike nokompiuta yimwe awike, ihe ngashingeyi sho pwa gwedhwa oonkwawo dhi li ntano, aanasikola pamwe naalongisikola otaya ka hwepopaleka omaunongo gawo mokompiuta. Oosikola oonkwawo dhoka dha pewa ookompiuta odho Oshikango (Ohangwena), Erundu (Oshana) naOkaepe Primary School mOtjozondjupa. Nedbank okwa gandja wo oshimaliwa okupitila mElelo lyOndoolopa yaNdangwa okutungitha omatala, okutungululitha nokuwapalekitha oosaala dhaavu moshipangelo shaNandjokwe. Oshimaliwa shoka konyala oshi li poodola N$300 000 lwaampoka. Kakele komagano ngoka, Nedbank okwa gandja ishewe omagano goodola N$7 000 kongundu yoompata dhaalongisikola melaka lyOshiiingilisa (Debating Society) opo ya pyokole owino yawo melaka lyopambelewa."
Your experience on this site will be improved by allowing cookies.
