• September 25th, 2018
Login / Register

Nombunga mpatanesi kapi dasikisamo kuruganesa yimaliva yado yonomiliyuna nawa


Kuzeeko Tjitemisa Windhoek - Mbunga politika zaRepublican Party (RP) ntani nezi vana kutumbura asi Workers Revolutionary Party (WRP) kuna kara nombunga politika mbali dakara mombongarero zanavenye, yina kumoneka asi nomvhura ntatu dina kukapitapo aw okapi vagava yitundwamo asi ngapi varuganesa yimaliva yawo eyi avagwana yokutunda kepangero. Moukuhuyunga usili, mbunga POLITIKA zaSWAPO zelike zasikisamo veta ezi unene kwava vana kara mombongarero zanavenye mosiruwo esi somvhura ezi. Eyi kayigeve nye ministera goyimaliva Calle Schlettwein mombongarero zanavenye sivike kasipwire. RP kwakara nomukarelipo gumwe tupu, Clara //Gowases mombongarero zanavenye, ano ezi nye vana kutumbura asi WRP kuna kara novakarelip vavali Salmon Fleermuys ntani Benson Kaapala. Nkenye silyo sombongarero zanavenye kwakara asi kugwana yimaliva yokusika ko N$900, 000 momuntu gumwe momvhura, ndi asi apa atutura eyereko lyoyimaliva kuhamena nye vakalimo mombongarero zanavenye. Yimaliva eyi ayi tundu kovafuti mutero ose kuyifuta kukwama yinema eyi twakara nayo, ntani kutara nye asi nkenye mbunga politika vantu vangapi zinba kara nawo mombongarero zanavenye. Nombunga nye odo ngesi kapi dayisikisamo asi vakeverere yimaliva eyi yokusika ko nomiliyuna N$9 ava gwana kepangero monomvhura edi ntatu. Schlettwein kageve eyi paapa kalimbwilire mapuro aga kapulire muhameni mombongarero zanavenye gombunga zaSWAPO, Hamunyera Hambyuka. Hambyuka kahere kudiva asi nombunga nye edi dakara mombongarero zanavenye, vasikisamo veta ezi zomahoroworo zina kutanta asi awo vahepa kugava yitundwamo asi ngapi vana ruganesa yimaliva oyo, yipo asi vagave nombapira dawo kukwama veta nokuyigava kombunga ezi azi gendesa mahoroworo moNamibia. Nadinye RP ntani WRP kapi vagava nombapira dawo donomvhura edi 2014/15, 2015/2016 ntani 2016/17 doyimaliva. APP age kapi gagava nye kutunda mo2014/15 ntani 2017/18 ano UPM azo kapi zagava yitundwamo yonomvhura 2014/15 ntani 2015/16. Mokugwedako, UDF, SWANU, RDP, PDM ntani Nudo awo kuna kara asi momvhura zimwe kapi vagava yitundwamo yoyimaliva oyo. Ano mbunga mpangeli zaSWAPO, zina kara ngesi asi kuna kara novahameni 127 muna kara asi vantu navenye kuvapakerera kuna kara 144 nombongarero nadinye mbali, kuna kugwana nye yimaliva yoyinzi azo kwagava yitundwamo yazo nayinye asi ngapi varuganesa yimaliva eyi kukwama veta ezi zakarapo. Mokukwama veta sintokorwa 58 zomahoroworo veta ( veta 5 zomo 2105), nombunga nadinye edi dina kara mombongarero zanavenye dahepa kukeverera yimaliva oyo vana kugwana kepangero yina kutunda meyereko lyosimaliva oso. Nkenye mvhura nombuinga murongo edi dakara asi mombongarero zanavenye kugwana simaliva kukwama asi vantu vcangapi vana kara nawo mombongarero zanavenye eyi vapulisira mediveta lyosirongo.
2018-07-19 09:47:44 2 months ago
Share on social media

Be the first to post a comment...