.jpg)
ǀAEǁGAMS – Sari ge hâ i, Kenyab Presidenti, Uhuru Kenyattab ge 29ǁî aitsama mâbasens ǁâudīb Namibiab dib tawa, ǂoago Donertaxtsēs ai, koas mîde Namibiab !Gao!gao Presidenti Sam Nujomaba gere mā, 1990ǁî kurib di mâiǂgāhes haisi-ams âb ge ǁîba kaise a ǂgaoǂgao!nâ !khais xa. Kenyattab hîa ge Donertaxtsēs ǁâudīb tawa sari-ao gowa-ao ib, ge Nujomab di mâiǂgās haisi-ams 1990ǁî kurib disa xu a ǂgaeǂguisa !âsa sao rase gere ǁgaeǁgae: “Tita ge ra mî ǂgao, nē !nâu tsî !nae!khaixa!nâ ǁaxasib tawas sida ǁaesa !norasasib daoba ra ǂgâsa. ǁAes ge ǁîs ǂaira ai go mâ. Nētsēsa xu da ge sada a ǀhonkhoe nē ǂhaba !hūb sada ǁgûn dib ai. !Goaxa ǁaeb nē !hūb dib ge sada !gomgu !nâ ǁgoe. ǁNā-amaga da ge ǂgom!gâb tsî !âubasens ǀkha sada !hūb di !goaxa ǁaeb ǁga nî kō.” Kenyattab ge ge mî, nē mîdi ǁîb tsî nau hâ Afrikab ǂgaeǂgui-aona ra ǂâiǂâi!nâsa !aromadi Afrikab !norasasib !khamdi tsî ǁkhoregu disa !oa. “Tita ge ǂgaoba xu hâ ǂan!gâsa ǂgui Namibiab !gari-aon hîa ǁîn ûiga nē !noras !khamdi !nâ ge māna ra ǁguiba, !khōǂgā hâse ǀnîn sao ra ǁōǂoa gen Kaptein Hendrik Witbooib, Chief Hosea Kutakob, Andimba Toivo ya Toivob tsî Anna Mungundas tsî ûitsama Ai!âkam President Hifikepunye Pohambab tsî !Gaogao President tsî Namibiab ǁaes di ǁgûb Sam Nuyomab hâna,” tib ge Kenyattaba ge mî. ǁÎb ge !aruǀî Afrikab ǂgaeǂgui-aona gere ǀkhoma in ǁgūba ai!âb ǁga ǂkhîb, khoena ǂgaeǂguis !nâ ǂans tsî ǀomkhâi ra ǀhûhâsiga ǂnuwisa, ǁanǂgāsaben ǁîn di ǀoasa ǁkhāsiga mû!ā tsî !hūb di ǀomkhâis !nâ nî !âse ǀguis khami ī !haoǀgora-i ose. “Namibia, kaisisas ge ra ǁgau, tsî sa kai !gâsata aseb ge Kenyaba ra ǁkhoreba si, îs aiǁgaus !âubasens dis ase Afrikab nî mûǂui xūse ība,” tib ge Kenyattaba ge mî. - Hāǀaro ra ǂhôan ge Nampasa xu hâ.
Kuzeeko Tjitemisa
2019-03-26 09:37:25 | 1 years ago
.jpg)
