OMUPOPI L I KO wopol i f i moshitukulwa Khomas okwa ti oimbuluma omo ovakainhu va nyekwa omaliko avo ile va longolwa ominyonena dopaixulu, sha ningwa vehe shi apa veli oya londa.

Warrant Silas Shipandeni okwa ti ovakainhu vahapu ova ninga oihakanwa yokukengelelwa ngeenge tava nu omalodu eshi ovalumenhu hava tula sha moikunwa yavo, osho hashi eta omunhu a hanife omaliudo, noku kala ehe shi apa eli.

Menghundafana a ninga naKundana Shipandeni okwa hokolola ta ti ovalumenhu ngeenge va hala okuya moixulo lomukainhu ndele omukainhu ina hala ohava kendabala opo veva tulile mo oingangamwifi oyo momalodu.

“Ovalumenhu ohava tula mo sha mouhalasha yovakainhu opo vati omukainhu a kwatwe komahalo okuya moixulo nomulumenhu tava nu naye,” Shipandeni ta hokolola.

Shipandeni okwa hokolola ta ti omafiku 25 omwedi ou ponhele opo hapa ifanwa Single Quarters moWindhoek, omukainhu weedula 35 okwa ningilwa oushada wopaixulo eshi a kwatwa onghonga konima eshi ta fekele kutya omulumenhu ou kwa li tava nu naye okwa tula mo sha mokahalasha kaye. Okwa ti oshiningwanima eshi okwa li sha ningwa lwopeetundi 20h00 no21h00 eshi omukainhu a kakala ashike a kwatwa mohalo okuya koixulo nomulumenhu oo.

Shipandeni okwa ti natango momafiku 18 Maalisa neduo, omulumenhu weedula 25 okwa kwatwa po eshi vati a kengelela omukainhu weedula 18 nomukalo oo tuu oo. Okwa ti omakonakono opolifi otaa twikile moibofa aishe ei yopavali yomakwatonghonga.

“Ovakainhu ka leni mwa kotoka ngeenge tamu nu omalodu novalumenhu shaashi ovalumenhu paife ove li ninga oikengelela yokuya novakainhu woixulo ngeenge va kolwa,” Shipandeni ta ti. “Ovalumenhu nanye ka leni mwa kotoka ngeenge tamu pokati kovanhu shaashi opena ovanhu hava kala tava kendabala oku tulila mo sha ovanhu moikunwa yavo” Shipandeni ta ti.

Okwa weda ta ti oshiwana nashi kale tashi lopotele opolifi diva kombinga yoikumungu ei opo opolifi i dule okukala ya ninga omakonakono diva. 

– fhamalwa@nepc.com.na