Omahepeko momagumbo oshowo omadhipagathano oga konenkwa taga indjipala moshitopolwa shaMusati.
Ndhoka okwa li dha popiwa kungoloneya gwoshitopolwa shaMusati Erginus Endjala, momushangwa kwa li gwa tothamo mo omaupyakadhi oshowo iilonga ya holoka moshitopolwa shawo.
“Omahepeko momagumbo oshowo omadhipago oga konekwa taga indjipala, nohaga holoka unene moshitopolwa shaMusati,” ta fatulula ngaaka.
Ta ti, ethimbo lyomumvo 2021/2022 iipotha yi li 254 yomadhipago nomahepeko momagumbo oya lopotwa ya indjipala noopelesenta ndatu, yi vule yomumvo 2020/2021 mbyoka ya li 247.
Omukuluntu gwopolisi moshitopolwa shaMusati okwa koleke kutya omahepeko gaantu momagumbo oshowo omadhipago oga indjipala moshitopolwa shawo.
“Nonando omaupyakadhi ngoka haga holoka, ohaga ningwa kaantu ayehe yomwenyo, Aanamibia oshowo Aangola mboka oyendji ye ya okulonga iilonga yomomagumbo moshilongo muka,” ta fatulula ngaaka.
Ta ti, opolisi oya kala nokukambadhala okugandja omalongo nkene oshigwana shi na okuninga uuna sha adhika komaupyakadhi ngoka taga vulu oku etitha omadhipagathano oshowo omahepeko gomomagumbo .
Linea Silvanus omuhungimwenyo gomolukanda Oneshila okwa li a yi moonkundathana noshifokundaneki shika nokwa li a fatulula nokugandja omatompelo oshowo iiyetithi yiiningwanima mbyoka.
“Onda koneke kutya oluhepo nalo otalu dhana onkandangala momahepeko. Unene ngele megumbo kamu na iiyemo ya gwana, ohashi eta omalungwenye, okunyenyeta sigo tashi eta omadhengathano, ngoka haga holoka momikalo dha yooloka mwa kwatelwa okudhipagathana oshowo okumonithathana iiponga,” ta fatulula ngaaka.
Silvanus natango okwa totha mo elongitho the first nayi lyiikolitha.
Ta ti, omahepeko okupitila miikolitha ohaga vulu okuholoka natango pamikalo dha yooloka.
“Ope na aantu mboka haya longo omiyonena konima ya nu iikolotha oshowo iingangamithi oshoka shoka ta ningi, ka vula okuyoolola ngele oshi li mondjila nenge osha puka oshoka omadhilaadhilo okwe ga piyaganeka niikolitha nenge niingangamithi,” ta popi ngaaka.
Ta gwedha po ta ti, ope na natango mboka ya itaala anuwa mokuthigulula omikalo dhaakuluntu yawo.
Ta ti ngaashi okudhenga omukiintu gwe oshoka anuwa nayina okwa li ha dhengwa kuhe, onkene oye shi taamba ko onga oshinima shi li mondjila.
“Oyendji oya taalela omahepeko ga yooloka momagumbo, ihe oya mbandamekwa, kaaya pitithe mo omauyelele ngoka,” ta popi ngaaka.
Opolisi ohayi longele kumwe naahungimwenyo, mboka oyo ye na ontseyo nkene nakuninga oshihakanwa e na oku eta uuyelele awuhe.
“Okulopota kuyele natango ohaku vulu okukwathela aakonaakoni ya mone uuyelele wa pumbiwa okumona uukwashili moshipotha, opo oshipotha kaashi kane oshowo uupyakadhi mboka wu na okukandulwa po,” ta fatulula ngaaka.
- vkaapanda@nepc.com.na