Home / Omalukanda Giinyakwi mOshakati Otaga Ka Teyagulwa Po Omalukanda Giinyakwi mOshakati Otaga Ka Teyagulwa Po
"OSHAKATI Elelo lyOndoolopa yaShakati okwa tegelelwa li ka tseyithe pambelewa kutya ogendji gomomalukanda giinyakwi inaga gwana okulumba aantu, osho Meya gwaShakati, Katrina Shimbulu e shi koleke. Mokupopya noshikundaneki shoNampa mOmaandaha, Shimbulu okwa tumbula gamwe gomomalukanda giinyakwi ngoka taga ka gumwa ketokolo ndika ngaashi Oneshila, Oshoopala, Kandjengedhi, Uupindi, Evululuko, Sky, Eemwandi naKalaula. Omalukanda ngaka pethimbo ndika oge li kohi yomeya gefundja konima sho nuumvo kwa monika omvula oyindji niitopolwa yayooloka moNooli yaNamibia oshowo miitopolwa yilwe muumbugantu waAngola okuza pehulilo lyaJanuali. Aakalimo yomomalukanda ngoka mboka ya yelulwa komeya gefundja pethimbo ndika oya tembudhilwa komahala gaali gopaipindi mOngwediva nOshakati, oshowo oshitopolwa shokatomeno kaMeatco nehala lyOmbuulaye yaNamibia mondoolopa ndjoka. Shimbulu ota ti etokolo okutseyitha pambelewa kutya omalukanda ngaka inaga gwana okulumbwa kaantu olya ningilwe mEtine moshigongi shelelo lyondoolopa. Poshigongi osho tuu shoka, iilyo yElelo lyOndoolopa oya ningi wo etokolo okutendulula oshitopolwa shoka hashi ithanwa Extension Nine po mu ka tembudhilwe aakalimo mboka taya ka tembudhwa okuza momalukanda ngoka taga ka teyagulwa po. Edhiladhilo pauyelele waMeya, okuyanda omatembu gaakalimo oyendji monakuyiwa tashi etithwa komeya gefundja. Meya okwa totha mo wo omikunda dhimwe ngaashi Othingo, Ompumbu nEhenye dhoka dha talika ko tamu vulu okukala aantu oshoka omikunda dhika odhi li pomilondo ano mpoka ihapu vulu okuthikwa nuupu komeya. Kepulo ngele elelo oli na tuu oshimaliwa shetembudho lyaakalimo okuya komalukanda omape, ano mboka ya tembudhwa komeya, Shimbulu okwa ti omukalo gwetendululo lyomavi nomalukanda itali ka ningwa muule wesiku limwe. ""Shika oshi li oprojeka yethimbo ele,"" Shimbulu ta ti. Aakalimo omayovi mOshakati nuumvo oya kala ya taalela onkalo yetembu sha etithwa komeya gefundja, naashika oshi li omutengi omudhigu komapepe gelelo lyondoolopa okushilipaleka kutya aantu oya tembudhilwa pomahala ge na egameno noku ya pa oshali iipumbiwanima yesiku. "
Your experience on this site will be improved by allowing cookies.
