New Era Newspaper

New Era Epaper
Icon Collap
...
Home / Ombara Riruako Uhumba Otjiwana?

Ombara Riruako Uhumba Otjiwana?

2008-04-18  Staff Report 2

Ombara Riruako Uhumba Otjiwana?
Omuhona Tjikuua Wari Otjihende! I Kae Matundu-Tjiparuro OMUPANDA Wari otjihende tjomonganda otjikamenwa tjoura, wari eharwi rounongo, wari omaundjiro, wari nomutima omukukutu, wari nourizemburuka ourikuramene, wari norusuvero nohange, wari omukuramenepo wa katjoruhonga, wari ihe yorukondua rwa Tjozondjupa, wari omuwa kowao omuvi kovarwe, wari omurwe nguhaaruka ombunda. Inga itjiva yomambo ovahungure peke peke nguvaungurisire mozombinika zao okuraisa kutja omuyaruke Ombara John Tjikuua wari omukendu. Koundandi okari nu tjizahutua mazehutua. Tjingetjo wari omundu omupupurukwe momwinyo. Maperekareka kutja wemuyendere vi. Kouvi okari kouwa okari. Ovimbumba novimbumba muvyo mumwari o Minister yOvitjitua vyOvarwe Ovakuru, Ngarikutuke Tjiariange, vyari pondjozikiro oseinina yomuyaruke ombara. Mozombinika zoruhoze mwari ombinika yotjiuri tjehi Hifikepunye Pohamba ndjareserwe iyomutize wotjihuro tja Kakarara, Ernst Katjiku. Ovanane vombazu peke peke wina yajandjere ondjozikiro yao komukwa. Muwo mwari Orata Zemburuka wotjitjita tjomuyaruke ngwaraisire kutja nandarire kutja Ombara Tjikuua ketjipo rukwao, ouvara we wombazu upuuri maukarere. Watjere ouvara imbwi nai wasewa notjiungura otjizeu tjitjasewa amatjirekareka komuti kutja turikwa. Otjiungura ihi otjomaverero wovanane vombazu vOvaherero o 46 tjitjari otjiungura omuyaruke Ombara Tjikuua nu tjatire natjo pomatumbo. Tjahungirire po Ombara Vita Thom, Mike Kavekotora watjere Ovaherero nOvambanderu apehe puveri kutja Okotjauana, okOngama poo ko South Africa vena otjina tjimwe tjitjevekuta kumwe. Eyanda nokutja vaza movakazendu hambombari vaine imwe. Munao eye otjehina kumuna kutja ouzeu wao okuwana uripi? Tjinene tjinga avena ozondando nozondero zemwe nderi ozongombe, omaryo, omeva, omahongero nouveruke. Imbi otja ku Kavekotora ovina mbyasere okuvewanisa naverire omundu umwe mokuvirwira nokuvipaha. Watjere omundu tjimotara kovandu varwe mbena ozondero zemwe verira omundu umwe mokuzerwira. Watjere ndoovazu ozondero zwee zaenenisiwa ndinondi tjiri kutja ehi rakuta poo kariyakutuka kaina kurira ongendo onene. Ihi watjere otjina tjimavanga okutjesa nomuhoko ukarareko. Watjere ohepero okuhana otuveze nokuyenena okutjiwa kutja rokuwana oorune nokuwanena tjike nokuhina okuhoveka ovina. Ihi otjitjari omuyaruke Ombara Tjikuua. Watjere Tjikuua wari otjihende okomiti yOtjiro Otjindjandja ya Puwo kaa itandere. Pombongarero oseinina yokomiti indji mOvitoto otjina tjoruwano yari ongendo yomuyaruke Ombara Tjikuua. Munao oruwano indui otjitjarire otjirumatua tjokomiti indji, Kavekotora watjere amatara kovakwao mokomiti indji nevetamuna komana oo Gerhard Zeze na Cleophas Mutjavikua. Wa rakizire otjiwana okuhina okupandera pekondua rimwe. Ombara Tjondu wa Kaoko wina wayauzire ekwamo ndakuta Ovaherero kumwe, oruzo neyanda mbya vevihaamisa pomuriro umwe. Watjere ngunda eye uri kekwamo indi. Eye warakizire kutja ohanganeno aihungirirwa pozondiro orondu kazena otjina tjimazehanganisa nazo omuhoko. Waraisire kutja omazemburukiro wozombara zOvaherero otjina peke kutjo otjini tjitjihasere kutja matjihana omuhoko posyo katjiperi ozombara tjiva zahenununwa mozongwao. Omuyaruke Tjikuua ongwee kutjanga orutuu mena rozombara azehe zOvaherero o 46. Ombara yarwe ndjatjitire nao yari Ombara Hosea Kutako uriri. Otjiru tjOvahona tjOvambanderu, Erastus Kahuure, watjere Ovambanderu nOvaherero vasere okwiitaverasana movyombazu kutja ovyao avehe. Tjingetjo Otjitiro Otjindjandja tjasere okuhara omuhunga umwe tjinga ozokomiti mbari nderipo nai azeyandja ouzeu nandarire kOvambanderu ovo mbehina okomiti yOtjitiro Otjindjandja. Watjere nozokomiti mbari inda Ovambanderu kavehitasana. Eye opazo okuhaamisa ombongarero mEpako okupuratena kozokomiti azeembari inda posyo ngamba oupeke wazo kauyapa Ovambanderu omuhunga. Munao Kahuure otjatjere mutu oruveze rwahoro kutja Ovambanderu nOvaherero mbena otjina tjOtjitiro Otjindjandja veritune tjinga otjina ihi atjiri otjina tjitjipuratenua ouye auhe nai. Watjere mondiro yOmbara Tjikuua ma muundjirwa ohange nomakaendero pamwe mOtjitiro Otjindjandja Ohani momuhoko nohange yari epu ndeere momahungi wovahungire peke peke mumwari ovahungure vombazu mbehari nohange kutja Ombara Otjitambi yOvaherero, Kuaima Riruako, kaari pombakero yOmbara Tjikuua. Wina aavemunu okuhina okukarapo ingwi otjo meinakauriro. Muwo mwari mOmbara Paulus Tjavara wOuvara wOtjikaoko ngwamunine okuhina okukarapo kOmbara Riruako otjotjirangaranga tje, tjinene tjikueya koruuwano. Ombara Riruako wazuvakere kutja waningirire kutja Ombara Tjikuua makapakwe kOkahandja nungwari omuhoko auhaitavere. Ombara Tjavara watjere Ombara Riruako warangangaranga rukuru okuza kombongarero yoruuwano ya Kakarara ndjayandja ondjivisiro kotjiwana ohunga nombongarero yOtjitiro Otjindjandja ndjari motjihuro o Bremena mehi rOvandoitji mu Tjikukutu mo 2005. Ombongarero indji pupari ozombara Christian Zeraeua, Alfons Maharero nomuyaruke David Kambazembi yahara okutara wina mondjira komurungu yOtjitiro Otjindjandja. Posyo mena rokutja Ombara Riruako kakarerepo aikutu kutja ozombara inda zekahakaene naye nu zezengurure omapitasaneno wazo naye.Ombongarero indji yakongorera oya Rotjitombo mu Seninani mo 2005 ndjazikamisa Okomiti ya Puwo yOtjitiro Otjindjandja. Ombara Riruako tjingetjo vaepasana nombongarero indji nu ngamba karupa rokomiti ya Puwo. Tjavara wayauzire omeriyandjero we komakaendero pamwe wOvaherero nOvambanderu mOtjitiro Otjindjandja natja tjinene mondiro yOmbara Tjikuua ihi otjirumatua tjingetjo tjeri otjirumatua okuza kozombara oo Muharukua, Nderura na Japuhua va Kaoko. Watjere okuhina kukarapo kOmbara Riruako movitjitua vyomuhoko katjina tjandinondi okwiisira kOmaruru ombura ndjazuko mouyenda wozondekurona za von Trotha tjasembamisa oruveze tjingero omazemburukiro wa Zombuzovindimba oetja 103. Wahiminwe kutja hapo omerihumbiro wOmbara Riruako inga motjiwana owe omwini poo otjiwana the oputjivanga? Watjere pasere okupaha oruwano kuna ovaina ndinondi wakarira owOvakwena. Tjingetjo pasere kutja mahongorere otjiposa tjozombara azehe o 46 ndehiyazemburukwa wananuna tjiva uriri kutja zezemburukwe. Munao otjaraisire kutja Ombara Riruako ongwa nambirahi otjiwana. Watjere kapena omundu nguhavanga oruwano posyo oruwano indui rwasere okurira rwa katjotjiri nduheri rwesembi. Ombara Riruako watjere omambo ngumazuu ngumaezu kOmupanda kena mwiihamwatima kutja kapari mena wokutja kena kumuna kutja nandaku waripo omambo atjayesana peke nu munao katjavanga okurira orupa nomambo omayamburiro inga ngehina ourenga. Watjere ongahukiro kutja omambo inga kamawanise no tjehina kumuna kutja omakarero we po atjayepwisa tjike.
2008-04-18  Staff Report 2

Tags: Khomas
Share on social media