New Era Newspaper

New Era Epaper
Icon Collap
...
Home / Omhumbwe yoikwafifohongo eshongo linene mOhangwena

Omhumbwe yoikwafifohongo eshongo linene mOhangwena

2022-07-06  Festus Hamalwa

Omhumbwe yoikwafifohongo eshongo linene mOhangwena

Ngoloneya moshitukulwa shaHangwena Walde Ndevashiya okwa ti omhumbwe yoikwafifohongo keefikola noshoyo eengulufikola inadi wana oi li eshongo linene mOhangwena.

Okwa ti neudo omwaalu wovanafikola mOhangwena owa wedelwa novanafikola 200 nosha eta opo paife opo moshitukulwa mu kale ovanafikola 117310.

Ndevashiya okwa ti oshi li eshongo linene shaashi omwaalu wovanafikola omuhapu ndele kapena eefikola devawanena.

Onghee okwa ti eshi otashi ulike kutya moshitukulwa omwa pumbwa omahangano a yooloka opo e uya a yambidide oshikondo shehongo noikwafifo.

Edi ngoloneya okwe dipopya Etitatu pefimbo ta tambula ko eengulufikola mbali kofikola Oshimumu Junior Primary School moshikandjohoololo shaMulonga.

“Ngeenge eefikola odi na oikwafifohongo ya wana noshoyo ovahongifikola, otashi eta opo ovanafikola va pite nawa noitwa iwa kexulilo lomudo,” Ndevashiya ta ti.

Eengulufikola oda tungwa kehangano loABF Fishing Company nongushu yoshimaliwa N$560 000.

Pefimbo ta yandje eengulufikola omunambelewa a ka telela po ehangano loABF Fishing Company, Ben Henghono okwa ti ehangano lavo ota li lalakanene okushakenaka epangelo ondjilakati tashi pitile mokuyambidida oshikondo shehongo.

Henghono okwa ti ehangano lavo okwa li shivifilwa kombinga yonghalo yofikola ei eshi ili momhumbwe yeengulufikola noshoyo oipundi, naashi osha eta opo va yambidide ofikola ei.

Moshipopiwa shaye omukulunhuwiliki wehongo mOhangwena Isak Hamatwi okwa ti okwa pandula ehangano loABF Fishing Company eshi la yambidida ofikola ei shaashi okwa li tai mono oixuna koikwafifohongo ina i wana.

Hamatwi okwa ti ombelewa yaye otai ka pitifa eemhito doilonga opo ovahongifikola va ninge omaindilo oilonga.

Okwa weda po ta ti omahangano a yooloka naa twikile okuyambidida oshikondo shehongo shaashi ehongo ola fimana kokaana keshe okaNamibia.

fhamalwa@nepc.com.na


2022-07-06  Festus Hamalwa

Share on social media