Home / Omikalo dhOmaidhipago Odha Yooloka Momapupi Omikalo dhOmaidhipago Odha Yooloka Momapupi
"OSHAKATI Iikondo moshitopolwa Oshana otayi ningi omapulapulo ge nasha niiningwanima 226 okuza petameko lyomvula sha landula komaso gaantu sha zi moonkalo dhayooloka tadhi limbililike. Aanawino yopaunamiti moshitopolwa oye na eitaalo kutya gamwe gomomaso ngoka kage shi gopauntshitwe ohaga etithwa komikithi dhomuuluwi/momutse, shika oye shi popi mokudhimbulukwa Esiku lyOkudhimbulukwa Uuvu wUupwidhi/wOmomutse. Omunawino gopaunamiti moshikondo shaapwidhi mUuministeli wUundjolowele nIilonga yOpankalathano, Dr. Ndahambelela Mthoko, okwa kundaneke oshifo shika kutya omapekapeko ga ningwa muuyuni otaga ulike kutya omuyalu ogundji gomaso kaa ge shi gopauntshitwe ge nasha nomaikuthomwenyo/omaidhipago oga kwatela mo aantu mboka ye na omaupyakadhi gomomutse. Sha landula kiiningwanima oyindji yomaidhipago moshitopolwa Oshana omvula ya zi ko, ngoka ge li 95, Dr. Mthoko ota ti shika osha etitha opo ku ningwe oshituthi shika moshitopolwa kohi yoshipalanyolo: ""Okupashula Oshigwana- Okushunitha pevi Oshiponga shika; Omikithi dhUupwidhi nOmaidhipago."" Oshituthi shika osha ningilwa mOsenda yIipindi mOngwediva eti 16 Kotoba, nosha kalwa kOminista yUuhaku nIilonga yOpashigwana, Dr. Richard Kamwi, Omukuluntuwiliki gUundjolowele mOshana, Dr. Naftali Hamata naapangi okuza moshipangelo shaShakati. Iitopolwa yimwe mbyoka yi na omaidhipago ongaashi Ohangwena moka mwa lopotwa iiponga 65, Omusati 57 nOshikoto 30. Omupopiliko gOpolisi moshitopolwa Oshana, Jonas Matheus, okwa koleke wo iiponga yomaso ngoka kage shi gopauntshitwe ngoka taga konakonwa natango kopolisi. Ota ti omaso ogendji ge nasha nomaidhipago oga tulwa moongundu nomikalo dhayooloka dhomaidhipago shi ikwatelela komimvo nomapupi goonakwiidhipaga. Omikalo dhoka hadhi longithwa unene kaalumentu yomimvo dhopokati 25 sigo 70 okwiimangeleka. Oshowo aakiintu mboka yomimvo dhopokati 15 sigo 56. Iiningwanima lela iishona moka to adha aakiintu yi iyaha, ihe omukalo nguka ohagu longithwa unene kaalumentu yomimvo okuza 24 sigo 94. Omaidhipago pakulongitha oopela odhindji oga konekwa kopolisi kutya ohaga holoka unene mokati kaalumentu yomimvo 18 oshowo 33, ihe ihashi monika naana maakiintu. Opolisi otayi ningi wo omakonakono giiningwanima ya pamba omaso gomomeya ngoka ga kwatela mo aakiintu yopokati 9 oshowo 43 moshitopolwa. Mboka ya adhika ya sa oye li momimvo okuza ndatu sigo 66; mboka ya fikwa oye li aalumentu yopokati komumvo gumwe sigo 15, oshowo aakiintu yomimvo heyali oshowo 85; mboka ya kambuka nokusa oye li aalumentu yopokati komimvo 20 - 23, oshowo aakiintu yomimvo ndatu sigo 33. Iiningwanima iikwawo mbyoka tayi konakonwa oyo mbyoka yaantu mboka ya sa omanga taya tandwa - mboka oyendji ye li aakiintu yomimvo dhopokati 18 oshowo 35."
Your experience on this site will be improved by allowing cookies.
