Omulumentu gomimvo 63 okwa si eso lyi nyanyaleka sho ohauto ndyoka kwa li ta hingi, ya li yiindhenge mumwe omutse nomutse nololi e tayi tema omulilo.
Sha kolelela kepeko lyopolisi, oshingingwanima shoka osha holoka lwokoongusha dhEtitano.
Otaku hokololwa kutya oshiponga shoka osha holoka mondjila onene yoB2, ookilometa ashike 30 okuya moUsakos okuza koArandis.
Opolisi oya hokolola kutya omusamane ngoka okwa li ta hingi ohauto yoPassat VW, ta zi koArandis uuka koUsakos, no mohauto okwa li mo oye ayike.
Otaku hokololwa kutya ololi ndyoka ontokele okwa li tayi hingwa okuza koUsakos yuuka koArandis, no kwa li tayi higwa komulumentu gomimvo 53, ngoka naye ali mo oye ayike.
Ta yi ti, omusamane ngoka kwa li tahingi okahauto hoka okashona, olutu lwe okwa li lwa hakele mohauto omanga omulilo gwa hwama.
Opolisi ta yi ti, omulilo ngoka ogwa li gweya okupondolwa ashike kukandhima mulilo ngoka a li athiki po pethimbo.
Omuhingi gololi okwa li a falwa koshipangelo, no ku li monkalo yi li hwepo.
Opolisi inayi yelitha kutya epuko olya etwa kulye, opo oohauto ndhoka ndhi ipumwe mumwe oshipala noshipala.
Omakonakono gopolisi oge li metifa.
Opolisi otayi tsikile okukumagidha oshigwana kaashi hingilile we, oshowo shi simaneke omadhidhiliko gomoopate.
Tayi ti, iiponga ohayi holoka unene una ohauto tayi hingililwa, ihe ngele ohauto otayi hingwa kashona onuudhigu yi ete oshiponga.
Opolisi oya kumagidha wo oshigwana shi kale tashi lopotele opolisi uuna sha londa moohauto tadhi hingililwa opo opolisi yomopate yi longe iilonga yawo mbala.
Ta yi kumagidha natango kutya, okuhinga kohi yomalovu ohaku eta iiponga, no haku faalele oomwenyo dhaantu.
Oshigwana nashi hinge nuukeka aluhe.
Opolisi oya ti otayi tsikile okulonga nuudhiginini okukwashilipaleka kutya aahingi yiihauto oshowo omandhindhiliko gomoondjila otaga landulwa nokusimanekwa.