New Era Newspaper

New Era Epaper
Icon Collap
...
Home / Omukulupe ngoka a li a thigi po aatekulu anuwa oku li moAngola

Omukulupe ngoka a li a thigi po aatekulu anuwa oku li moAngola

2022-05-11  Victoria Kaapanda

Omukulupe ngoka a li a thigi po aatekulu anuwa oku li moAngola

Opolisi moshitopolwa shaShikoto oya ti omukulupe gwomimvo 63 Anna Johannes ngoka a li a thigi po aatekulu ye yaheyali, okwa monika e li monkalo yi li nawa moAngola.

Moonkundathana dhopangodhi nomukwanezimo gwe Maria Homateni, okwa ti, Johannes okwa popi nayo kutya, ota kala a galuka nena, ashike hoka e li kaku na nando uupyakadhi.

“Inatu mu mona natango koshipala, ihe otwa monathana pangodhi momasiku gaheyali gomwendhi nguka, ta ti, ota kongo oombe dhe koAngola, nota galukile kegumbo,” ta fatulula ngaaka.

Homateni okwa ti, oye li metegelelo, nongele ina thika otaya ka tseyithila opolisi natango.

“Aanona oye li monkalo yi li nawa, yamwe oya ilwa po kooyina omanga yamwe otu li nayo,” ta ti ngaaka.

Opolisi oshiwike sha zi ko okwa li ya indile moshigwana yi kongithwe ko komukulupe ngoka a li a thigile omuniinilonga gomuAngola aatekulu ye yaheyali.

Tayi ti, omuniilonga ngoka okwa li a thigwa momalimbililo sho omukulupe a ningi omasiku gaali kakwa li a galukila kegumbo, nongodhi ye yopeke okwa li ya dhima.

“Omukulupe okwa li a zi megumbo a ya kopenzela, hoka a li inaa galuka we. Omuniiloga okwa li a thigilwa aanona mboka ayehe ye li kohi yomimvo hetatu,” opolisi tayi hokolola.

Sho anuwa aapolisi yokukonakona iipotha yomahepeko gomagumbo ya li ya talele po egumbo ndyoka, uunona wumwe okwa li tau ulike wu na omanyutu nokwa li wa falwa koshipangelo ethimbo olyo tuu ndyoka.

Opolisi okwa li ya zi ko wo naanona mboka esiku ndyoka, omanga kwa li tayi kongo aakwanezimo.

Omukuluntu gwopolisi moshitopolwa shaShikoto Armas Shivute okwa ti, aakwanezimo yaJohannes okwa li ya nothele ko opolisi kutya oye mu mona konima kwa li e ya dhengele ongodhi kutya oku li moAngola, ta kongo oombe dhe.

“Johannes anuwa okwa li a dhengele aakwanezimo ye ongodhi sho a li a yi pomakuthikuthi oshoka hoka e li, omakuthikuthi itaga kwata nawa,” ta ti ngaaka. –vkaapanda@nepc.com.na


2022-05-11  Victoria Kaapanda

Share on social media