New Era Newspaper

New Era Epaper
Icon Collap
...
Home / Omulonga gwaShitutuma gwa gandja iilonga

Omulonga gwaShitutuma gwa gandja iilonga

2022-05-06  Victoria Kaapanda

Omulonga gwaShitutuma gwa gandja iilonga

Aakalimo yomomikunda dhayooloka moshitopolwa shaMusati oya ti, nonando oyendji ihaya kwata openzela yo ihaya mono omayambindhindho galwe okuza kepangelo, omulonga gwomeya gwaShitutuna ogweya pa iilonga. Taya fatulula kutya ohaya landitha oohi omvo aguhe.

Pethimbo ndika otaya kwata oohi, taya landitha omanga oontalala, momukokomoko komvula natango ohaya landitha oohi dha kukuta. 

Mirjiam Shanghala a yambukile momukunda Okalumbi  ngoka gu li po pepi nOshitutuma okwa ti, okulandithi oohi otaku ya yambindhindha lela, okugwanitha po oompumbwe dhimwe.

“Ondina aanona ye li kiiputudhilo yopombanda, tandi yafutile omahala mpoka haya zi, tandi landa iikulya oshowo okufuta oosikola dhawo, ihe oshimaliwa ohandi shi kutha mokushingitha oohi dhandje” ta popi ngaaka.

Ta fatulula ta ti, ndjika ompito yiilonga, oshoka ondina shoka tandi vulu oku eta poshitafula opo aantu yalye. “Ohatu kwata oohi dhetu dha gwana opo tu vule okudhi kukutika nongele ethimbo lyadho lya piti, se ta tu landitha ndhoka dha kukuta,” ta fatulula ngaaka. Shanghala ta ti, pethimbo ndika oohi dhoka dhili momeya inadhi koka nawa, oontangu odho onene nawa. Ta popi ta yolo ta ti, ita vulu okupopya kutya oha longo iingapi komwedhi oshoka ookalyamupombo nayo otaya lesha. “Otandi ti owala, ohandi mono oshimaliwa sha gwana okuyambindhindha aakwanezimo yandje” ta popi ngaaka. Kaino Iitembu ngoka naye ha kwata oohi okwa ti, ohaya longitha oondjolo oshowo oonete okukwata oohi, ndhoka haya lala yedhi tula momeya.

“Ihatu longitha iishongo oshoka omeya ogendji unene. Ohatu penduka ongula lela, ta tu tala oondjolo dhetu ngele odha ndjolola oshowo oonete ngele odha kwata oohi. Ihe shoka ohatu shi ningile oshita,” ta ti ngaaka. Ta ti, ohayaka tala oondjolo dhawo pethimbo limwe oshoka inaya hala okuvongola omeya, onkene oyena oowili haya yi momeya. “Ota tu pandula oshoka otuna mpoka tatu hupile, nonando se yamwe inatu mona embo no pena, ota tu pandula natango oshoka katuli momapandaanda ta tu indile nenge ta tu yaka iinima yaantu,” ta popi ngaaka.

Nonando oshifokundaneki shika okwa li sha kundana kutya ekwato lyoohi momulonga ngoka gwOshitutuma okwali ta li keelelwa aantu, aakalimo oya yelitha kutya ayihe oyi li nawa paife no ya mangululwa okukwata oohi dhawo.

– vkaapanda@nepc.com.na


2022-05-06  Victoria Kaapanda

Share on social media