Omunyeumbo weedula 56 okwa fya eshi a tuwa nombele kukaume kaye Etitano lwopotundi 22h00 keendingosho pomukunda Eengolo moshitukulwa shaMusati.

Nakufya okwa tongolwa oye Tuyeni Kaleb Hango omukalimo womomukunda Eengolo.

Omukonakoni woimbuluma wopolifi moshitukulwa shaMusati omupedu Commissioner Moses Simaho okwa hokolola ta ti omufekelwa okwa li tava tanguna naHango efimbo loufiku eshi kwa li ve li pondingosho imwe.

 Okudja opo vati Hango okwa kufa odibo ndele ta denge omufekelwa komutwe fiyo omufekelwa ta mono oshiponga.

Opolifi oya hokolola tai ti vati omufekelwa naye okwa kufa ombele yokapi ei kwa li a homata ndele ta tu Hango loikando ivali mepepe nokomatwi fiyo ta xulifile ponhele opo.

Olutu laHango ola twalwa kokila yoshipangelo shaOutapi novakwapata vaye ova shivifilwa efyo laye.

Omufekelwa oku li moshipangelo shaOutapi ta mono epango lopaunamiti eshi a mona oshiponga nomakonakono opolifi otaa twikile.

Opolifi onghee tai twikile nokukunghilila oshiwana opo shi xulifei po okuya noilwifo keendingosho shaashi ngeenge omunhu a kolwa oha kala a kwatwa komhepo yokulonga oimbuluma eshi shi li sha nyika oshiponga neenghono mokati kovanhu.

- fhamalwa@nepc.com.na