Oministeri yOuveruke nOzombatero kOtjiwaṋa mai rakiza otjiwaṋa okuhina kuuruma nungwari okuungura kumwe na yo nokukongorera omikambo avihe mbi mai twa po mongondjero yokuṱizira omutjise mbwi motjitoma nokutjurura omahandjaukiro wOruemo poo Otjindjumba tja Congo.

Wina ovandu avehe mba hakaenene na ingwi ngwa munikirwe omutjise mbwi nu ngwa ṱire, mave ningirwa okuvaza poruveze rwouveruke rwopopezu na vo tjimanga. Ngunda ape ri nao orupa rouveruke maru kaenda komurungu okutjevera kangamwa omahwangero ngu maye yenene okutambuka. Nokutarerera ongaro ndji popezu nokutjivisa otjiwaṋa. 

Oritjavari nda zu ko tji ya ri 16 komueze mbwi Kambundu, omurumendu otja munikirwe ondwi yOruemo poo Otjindjumba tji tjiukwa otjoCongo Fever mEpako. 

Eye wa pangerwe na hindwa kOtjomuise ka kayakurirwe monamiti ombirivate ndji oLady Pohamba Oritjatatu nda zu ko nOritjaine nda zu ko a hindwa kOnamiti yOmondivitivi yOhoromende, ndi ri eyuva eye wina nda ṱire. Omatarero wombinḓu ye ndja nanenwe ngunda eye hi ya ṱa ya yauzire kutja u nomutjise mbwi. 

Okuza kOritjaine nda zu ko pa tarerwe ovandu avehe kumwe 27 mba hakaenene ku nomuṱi, 24 mbe ri ovaungure vorupa rouveruke nomuungure umwe wapu na ye novature vevari vapu na ye. 

Ngunda ape ri nao otjomatjururiro otjiwaṋa matji kwamberwa ko okutjatja ovinamuinyo nomiti; okuzara ozombanda ozovetjevere (zomaoko omare, omake nozomburukweva ozonde) tji mave ungura novinamuinyo poo omaṋi wavyo tjinene tji mavi ṱu moutomeno poo pozonganda.  Wina otjiwaṋa matji sokukonḓonona ozombanda zavo notutu twavo kozongupa nu tji ve ze vaza ko okukarapota koruveze rwouveruke rwopopezu poo okukondja okuisako nongengezero nu noviungurisiwa mbi ri vyo. Tjinene nokuhina okunyanyaura ozongupa.