Aahingi tekisi mboka ya ningi ethimbo haya londekele aafaalelwa yawo pehala kaali na elandulathano, okuya kOshikango oshowo kOshakati ya mono ehala lyokulondekela pOmwandi mOndangwa. Omunambelewa omupopiliko gwelelo lyondoolopa yaNdangwa Petrina Shitalangaho okwa ti, ehala ndyoka olya kala lyi li methano ewinayi ethimbo ele.
“Ehala ndyoka olya kala ha li longelwa iilonga iiwinayi kaafuthi, omolwa embwalangandyo lyawo. Sho shoka lya tungwa opo li kale melandulathano,” ta fatulula ngaaka.
Ta ti, ehala alihe okwa li lya tungwa koshimaliwa shongushu N$500 000, no lya li lya tamekwa okutungwa nuumvo muMalitsa, ihe ngaashingeyi olyapwa. “Nonando ta tu tanga kutya mpoka hapu kala iihauto opwapa okulongwa, elelo lyondoolopa olyi li metifata oku eta po uundjugo oshowo okutula po ehala lyomangeshefelo,” ta ti ngaaka.
Ta gwedha po ta ti, ngele ehala ndyoka olya tameke okulongithwa, aahingi yoohauto haya londekele pehala mpoka otaya kala ya nyanyukwa oshoka itaya londokele we po pepi nondjila yiihauto, oshowo okasitoma dhawo otadhi kala megameno.
“Ehalandyokaolyakalanatango uupyakadhi kaayendinandjila, sho oohauto dha kala hadhi hingi noku tondekela ookasitoma pehala alihe ndyoka,”ta ti ngaaka. Ta ti, ehala ndyoka ota li ka eta engungumano lyaahingi yiihauto oshowo ookasitoma. Shitalangaho ta ti, ehala ngele olya yela lyo olyina elandulathano oha li kala ta li hili ookasitoma.
“Pehala lyoku londekela ndyoka epe, otapu kala pena elandulathano oshowo oompango nomalandulathano taga landulwa okuli kaleka lya yela,” ta fatulula ngaaka.
Simon Petrus omuhingi gotaxi okuza mOndangwa okuya kOshikango okwa ti, oya pandula elelo lyondoolopa sho lyeya tungile ehala lyokukonga ookasitoma dhawo. “Ehala ndika ota li ketu longitha nuupu oshoka itatu ka kala we ta tu tondoka tuuka mopate, ta tu kondjele ookasitoma,” ta pandula ngaaka.
Ta ti okwa hala elelo lyondoolopa lyi tule po wo natango omalandulathano opo aahigi ya kale taya longele kumwe pe hala mpoka. Petrus okwa ti, nonando ota pandula, itaka tsa kumwe nelelo uuna ta li kapula iifuta yomayakulo pehala mpoka.
– vkaapanda@nepc.com.na