Home / Oombudhi Dha Teya Nokuya Oondjembo dhEpangelo Oombudhi Dha Teya Nokuya Oondjembo dhEpangelo
"WINDHOEK Aafekelwa mboka inaya tseyika natango kutya oyo oolye oyi iteyele moombelewa dhUuministeli wEgameno nEpopilo lyOshigwana dhoka dhi li mepandaanda Krupp Street mOvenduka nokuyaka mo omaludhi goondjembo oshowo iilwitho yontumba koongulasha dhOlyomakaya ga zi ko. Aafekelwa oyi iteyele metungo okupitila momuyelo gwoshitenda gu li muumbugantuninginino wetungo ndyoka. Omupopiliko gOpolisi, Omukuluntu Inspekta Angula Amulungu, ota ti oombudhi odha teya omuyelo gumwe gomoombelewa nokukutha mo oondjembo dholudhi lwoG3 dhi li hamano, oondjembo dhoautomatika dhoomilimeta 7.62, oombistoli mbali dhoomilimeta 9 oshowo yimwe yoomilimeta 5.65. Aafuthi aniwa oya teya omiyelo dha longwa moshiti nokukutha mo ompungulilo ontshona moka hamu kala ooshapi dhombelewa. Oombudhi odha yaka po ishewe oshitopolwa sha simana shokompiuta (hard-drive) moka hamu pungulwa omauyelele, moka ano mu na omauyelele ogendji ge nasha niinima ayihe yopambelewa. Oombotsotso odhe shi pondola ishewe okuya nomuyalu gwontumba gwiimaliwa mombelewa yimwe pondondo yopevi. Pauyelele waAmulungu, aafekelwa mbaka otashi vulika ashike ya ka kukuma uumbanda sho oalarama ya tameke okulila noya zi mo ompadhi ketako nokufadhuka po. Amulungu okwa holola elimbililo lye shi nasha noshiningwanima shika, molwaashoka iilwitho mbika otashi vulika yi ka longithwe okulonga iilonga yiikulumuna nomiyonena dha dhiginina ngaashi omadhipago nenge omuyeka kwahomatiwa. ""Aantu mboka oya nika oshiponga koshigwana. Tse inatu hala okutseya kutya otaya ka longitha shike iilwithi mbyoka. Otwa limbililwa shili noonkondo,"" Amulungu ta ti. Ota ti oveta itayi pitike nando aakwashigwana ya kale niikondjitho yoludhi ndoka. Iinima yilwe inayi tumbulwa nayo oya yakwa po pethimbo lyoshiponokela shika. Kape na omufekelwa a tulwa miipandeko shi nasha neteyo ndika. Natango inashi tseyitha ngele etungo okwa li lya tonatelwa kaatonateli oshowo nkene aafuthi mbaka ye shi pondola okuteya shoka tashi monika sha fa ya pewa omauyelele kumboka ye shi mo nawa oshowo omauyelele ge nasha noondjembo. "
Your experience on this site will be improved by allowing cookies.
