New Era Newspaper

New Era Epaper
Icon Collap
...
Home / Oongeleka Otadhi Ka Umba Ongala yOprojeka BIG

Oongeleka Otadhi Ka Umba Ongala yOprojeka BIG

2008-05-09  Staff Report 2

Oongeleka Otadhi Ka Umba Ongala yOprojeka BIG
"WINDHOEK Ongongahangano yOongeleki moNamibia (Council of Churches in Namibia -CCN) otayi indile iilyo yayo opo yi umbe ongalo yowina okuyambidhidha oprojeka yedhina Basic Income Grand (BIG) mOsoondaha ndjika yaPentekoste eti 11 Mei 2008. ""Kehe mpoka tapu ka ningilwa Omalongelokalunga gOpaukumwe mOsoondaha yaPentekoste, ongalo oyi na okununinwa oprojeka yoBIG,"" osho omukanda gwoCCN tagu ti. Nuumvo Osoondaha yaPentekoste otayi dhanwa momasiku 11 Mei, moka Aanamibia omayovi kwa tegelelwa ya ka gongale moondoolopa 40 nokugalikanena oshilongo shetu Namibia oshowo iishiindalongo yasho. Eumbo lyongalo olyo limwe lyomomatokolo ga ningilwe pomutumba goCCN gokomumvo gwa gongalele okuza eti 27-30 Apilili. Oshipalanyolo shomutumba ngoka osha li ""onkatu komeho meitaalo omolwaNamibia e li hwepo."" Eumbo lyongalo oli li yimwe yomoonkambadhala dhegongelo lyoshimaliwa okukandula po oompumbwe dhaamboka ye li moluhepo moshigwana. MuJanuali nuumvo, oprojeka yedhina BIG oya tamekele noproholama yomalolelo okugandja N$100 momukalimo kehe gomaakwashigwana 100 molukanda Omitara ookilometa 155 muuzilo wOvenduka. Nonando oprojeka ndjika oyi na po natango oshimaliwa sha gwana uule woomvula mbali komeho, ombelewa yoBIG otayi ti oya hala Aanamibia oyendji ya kuthe ombinga mokuhwepopaleka iihuna yaakwashigwana yakwawo moshilongo. Omupresidende goCCN, omusita Erich Hertel, ngoka a gandja omatokolo pehala lyokomitiye, ota ti omutumba gokomumvo ogwa nyanyukilwa etotepo lyoprojeka yoBIG ndjoka tayi ningi omalolelo mOmitara. Okwa hokolola oprojeka ndjika ""ongehokololo lyopashinanena lyOmusamaria omunamutimahenda, moka emanguluko epe lya holokela aantu mboka ya mona iihuna pamahupilo nokutuma etumwalaka lyoonkondo dhehupitho netegameno."" Maggy Hansen gwombelewa yopankalathano moEvangelical Lutheran Church in the Republic of Namibia, okwa kundaneke oshifo shika metiyali kutya etata lyoshimaliwa shoka tashi longithwa mokutula miilonga oprojeka yomalolelo osha gandjwa kAanamibia, ihe inaya hala ashike aantu ya kale itaya gandja sha omanga yakwawo pondje yaNamibia taya gandja oshimaliwa koprojeka ndjika. ""Otwa hala oshinima shi kale shAanamibia yoyene,"" osho Hansen ta ti. Okuyelekanitha nenge okutalulula shoka sha etwa po koshimaliwa shoka konkalo yaantu pOmitara, ombelewa otayi ka ninga omapekapeko okuza eti 30 Juni sigo 4 Juli. Omapekapeko otaga ka tala kombinga yomashongo nesindano lyetulomiilonga lyoBIG. Okakomitiye koBIG pOmitara ota ka ti oshimaliwa shika osha hwepopaleka nale oonkalamwenyo dhaakwashigwana pakuyeleka omanga oprojeka inayi tameka muJanuali nuumvo sho aantu kaya li ye na iiyemo okulanda iipumbiwanima yesiku. CCN oku li oshilyo shimwe shomiilyo mbyoka ya tota po oproholama yoBIG. Pokati mpoka, Aanamibia omayovi otaya ka gongala moondoolopa dha konda pomilongo ne moNamibia alihe okugalikanena Namibia, omakuyunguto moZimbabwe oshowo moshitopolwa ashihe shUumbugantu waAfrika. Omusita Stephan Nell goTransformation Namibia, ota ti omaupyakadhi ngoka ga taalela Namibia ngoka taga ka galikanenwa oga kwatela mo ngaashi onkalo yokwaaniilonga, oHIV/AIDS oshowo omahogololo ngoka taga ka ningwa moshilongo momumvo 2009. Nell ota ti ooitaali otaya ka pandula wo Omuwa omolwonkalo yopapolotika ya ngunguma moNamibia. Esiku ndika lyomagalikano muuyuni molwaashoka otali ka ningwa mEsiku lyOomeme, oproholama otayi ka kwatela mo wo iinima ya guma aakiintu, Nell ta ti. Momumvo 2007, oondoolopa 34 odha kuthile ombinga megalikano ndika ndyoka lya ningi esiku enene moka ooitaali oyendji ya gongalele mesiku limwe muuyuni auhe. Esiku ndyoka lya totelwe moCape Town momumvo 2001, esiku ndika konena ohali dhimbulukiwa muuyuni auhe nolya nuninwa iigwana yi itedhulule nokukonga oshipala shaKalunga oku shi talela momaupyakadhi ngoka ga taalela iigwana yayooloka. Nuumvo, egalikano otali ka kwatela mo wo omainyanyudho gomaudhano/ondaanisa nomalweendo gaantu ya yelutha omapandela giigwana yayooloka muAfrika. Omvula ya zi ko, oonguti 120 dhoka dhi li oshidhimbulukitho shOmbepo Ondjapuki okwa li dha etelelwa pegalikano pOkapale kaSam Nujoma mOvenduka nokweethwa dhi tuke mombanda pethimbo ndyoka. Esiku ndika lyEgalikano mUuyuni otali wilikwa koovelise mbali dhomOmbimbeli; ano 2 Chronicles 7:14 oshowo Habakkuk 2:14. "
2008-05-09  Staff Report 2

Tags: Khomas
Share on social media