Home / Oontamanana dhOongamba Pokati kOtjinene nEpukiro Oontamanana dhOongamba Pokati kOtjinene nEpukiro
WINDHOEK Aakalimo yomiikandjohogololo Otjinene nEpukiro otayi indile Uuministeli wOmavi nEtulululo oshowo Uuministeli wOmalelo gOpaitopolwa, Oondoolopa, Omagumbo nOmapendulopo gokOmikunda wu ye mo okanyala moontamanana dhi nasha netendo lyoongamba dhoka dha holoka moshitopolwa Omaheke. Ehilathano pokati kiikandjohogololo iyali oli nasha ngele omalelo gopamithigululwakalo ngoka ge li moshikandjohogololo Otjinene, oge na uuthemba wopaveta okupulakena iihokolola yompangu yopamuthigululwakalo oshowo okugandja evi moshikandjohogololo Epukiro. Kansela gOpashitopolwa gwEpukiro, Brave Tjizera, ota ti omalelo gopamuthigululwakalo ngoka ge li mOtjinene kage na uuthemba washa moshikandjohogololo Epukiro molwaashoka mEpukiro kamu na omalelo gopamuthigululwakalo ngoka ge na oonkondo dhika nenge oshinakugwanithwa shika paveta. Tjizera oti indile omalelo gopamuthigululwakalo mOtjinene oshowo Kansela gwawo Nguvitjita Toromba opo ya simaneke eithikamenopo lyelelo lyoshikandjohogololo Epukiro, nokuhulitha po eidhopomo miinima yoshikandjohogololo Epukiro. Ota ti kashi li nawa opo omalelo ge vulithe limwe ga kale noonkondo dhokulela moshitopolwa shimwe molwashoka shika otashi vulu okweetitha ekuyunguto. Elelo lyAaherero kohi yewiliko lyElenga enene Alphons Maharero olya ziminwa papangelo ongelelo lyopamuthigululwakalo moshikandjohogololo Otjinene omanga Elelo lyOpamuthigululwakalo lyAambanderu kohi yewiliko lyOmbala yaNguvauva lya ziminwa paveta okukala elelo mEpukiro. Kakele, Toromba okwiitaala kutya etendo lyoongamba dhopapolitika kali nasha noonkondo dhomalelo gaawiliki yopamuthigululwakalo. Ota ti omalelo gopamuthigululwakalo ngoka ge li mOtjinene otaga vulu okupulakena iihokolola nokugandja evi moshikandjohogololo Epukiro. Toromba ota ti oshili osho shika kutya elelo lyoshikandjohogololo Epukiro oli li miikaha yombelewa yoshikandjohogololo shalyo, shoka hasho tadhi tsithwa oompata. Ihe shoka sha eta oontamanana osho ngele omalelo gopamuthigululwakalo ngoka ge li mOtjinene oge na uuthemba nenge aawe okupulakena iihokolola yopamuthigululwakalo nokugandja evi, kakele aalelwa yawo yamwe oye li moshikandjohogololo Epukiro, ano ngele omalelo oge na uuthemba wopaveta okuungaunga niinima ya guma aalelwa yawo. Toromba okwa gandja oshiholelwa shElelo yOpamuthigululwakalo lyaNdonga, ta ti nonando elelo ndika oli li mOshana, oli na uuthemba wopaveta okupulakena iihokolola yomOshikoto oshowo mOmusati. Okwa gwedha ko kutya nonando okwa ya mekwatathano naanambelewa yUuministeli wOmalelo gOpaitopolwa, Oondoolopa, Omagumbo nOmapendulopo gokOmikunda, okwa lombwelwa kutya omukalo ngoka ogwo tagu longithwa miitopolwa yilwe ayihe moshilongo, noveta oye shi pitika. Aakalimo yamwe moshikandjohogololo Epukiro, mboka omanga etendo lyoongamba inali ningwa noya li kohi yelelo lyoshikandjohogololo Otjinene mboka oyendji ye li kohi yElelo lyOpamuthigululwakalo lyaMaharero, otaya ti kaye na okulelwa kelelo lyOpamuthigululwakalo lyAambanderu moshikandjohogololo Epukiro. Aakwashigwana otaya ti kutya oye na uupyakadhi welaka nohaya popi Otjiherero shoka sha yooloka kOshimbanderu, notaya indile kutya Elelo lyOpamuthigululwakalo lyAaherero olyo nali kale hali pulakene iihokolola yawo. Tjizera okwa ekelehi omapopyo ngoka ta ti omipopyo dholudhi ndoka otadhi vulu okweetitha etopauko. Ota ti ope na ashike okayooloko okashona pokati kOvaherero nOvambanderu, nomihoko dhika ohadhi vulu okupopya elaka limwe nokuhokanathana. Otjinene osha kala oshikandjohogololo shimwe awike konima yemanguluko, kakele osha ka topolwa pokati miikandjohogololo Otjinene nEpukiro omanga omahogololo gomumvo 2004 inaga ningwa.
Your experience on this site will be improved by allowing cookies.
