Opolisi mOshitopolwa shaHangwena oya kumagidha oshigwana shi kale tashi kongo omakwatho kiipangelo, uuna sha adhika kamaudhigu taga pumbwa ekwatho lyopaunamiti.

Omupopiliko gwopolisi moshitopolwa shaHangwena Andrew Nghiyolwa okwa li a popi ngaaka, sha landula oshiningwanima shoka sha holoka Osoondaha ya zi ko, sho omukiintu gumwe a Ii a monene okanona posheelo shosasiona yopolisi.

“Omukiintu gumwe okwa li a monene ohanona komeho gosasiona yopolisi
yOngha, pethimbo kwa li ta kongo ekwatho,” ta popi ngaaka.

Ta ti, yo aapolisi, kaye na ontseyo yopaunamiti, ishewe iihauto yawo inayi longelwa oombete hoka omunuumvu ta vulu okulala nenge okulaleka omukiintu ta thetwa.

Nghiyolwa ta ti, ohashi kala oshihwepo ngele oshigwana tashi kongo iihauto yopaumwene opo yi ya fale kiipangelo.

Ta gwedha po kutya oomeme ye li momategelelo ye li kokule niipangelo, naya kambadhale okuya popepi noshipangelo, opo ya ka tegelele, yo ya yande uupyakadhi ngaashi mboka wa holoka momeho gaapolisi uunambo.

“Iiningwanima yi li ngaaka otayi ka eta omaso komasiku gokomeho, nomolwaashoka tatu indile oshigwana shi kale tashi kongo omayambidhidho gomondjila,” ta kumagidha ngaaka.

Ta ti, olundji ohaya ithanwa komaupyakandhi, hayo ye na oku ga kandula po.

’’Oshigwana nashi shiwe uuna shi na okuyambidhidhwa kopolisi nuuna shi na okuyambidhidhwa kopolisi,” ta popi ngaaka.

Nghiyolwa natango okwa popi kutya oya ndhindhilike kutya oshigwana ohashi ya tenteke uundhigu kaaushi wa wo.

‘’Kehe shimwe tashi holoka ohashi ithanenwa ashike opolisi, oshigwana nashi kale tashi yoolola,’’ta popi ngaaka.

Opolisi oya kumagidha wo oshigwana shi kale shi na oonomola hoka taya dhenge uuna pwa holoka omaupyakadhi gontumba.

Omaupyakadhi gomeendelelo ngoka haga holoka ombaadhilila oge na oonomola ndhoka hadhi dhengwa okukandula po omaupyakadhi meendelelo.

Omaupyakadhi gombaadhilila ongaashi, iiponga yomoondjila, omililo, omayikutho gomwenyo, oshiponga sholusheno nosho tuu.

– vkaapanda@nepc.com.na