Opolisi moshitopolwa shaShana otayi indile moshigwana kehe ngoka ena uyelele mpoka pena omulumentu gwomimvo 31 Christian Lourence a lopotele opolisi yi li po pepi naye.

Omukuluntu gwopolisi moshitopolwa shaShana Thomas Aiyambo okwa ti, omulumentu ngoka okwa li ihulwa okumonika momasiku 02 gaMay nuumvo.

“Ota tu indile nesimaneko ngoka wuna uyelele mpoka pena omulumentu ngoka opo a tseyithile aakwanezimo nenge opolisi oshoka oye li momalimbililo,” ta indile ngaaka.

Otaku hokololwa kutya Lourence okwa li a monika lwahugunina pehala kulondekela uutekesi po pepi nombaanga yiimaliwa yoFNB pOshana Mall mOngwediva.

Aiyambo ta ti, okwa li a ndhindhilikwa a zala okambindja okaluudhe, ojeana ombulau, oongaku oontokele oshowo nokwali a humata okafagalala okaluudhe peke.

“Natango okuna oshihalathithi oshinene mokana, shoka tashi vulu oku mu ndhimbululitha kutya oye, kwaa mboka keye mushi,” ta popi ngaaka.

Ta ti, aakwanezimo okwa li ya ningi oonkambadhala adhihe okumukonga ihe oya huulile muunyengwi.

Otaku hokololwa kutya ongondhi ye yo peke nayo kayimo mombepo.

“Omulumentu ngoka okuna olutu lwopokati, omuludhe molwaala, ye okwa pandwa momutse,” ta ti ngaaka. Aiyambo ta ti, oya lopotelwa kutya oshikando sho tango omulumentu ngoka kee wetike omasiku agehe ngoka.

Otaku hokololwa kutya okwali ha longo mositola tayi ithanwa Hifi Corp mOngwediva, no kwali hazi pehala tali ithanwa Gwanoko flats kOngwediva onkulu. Uuyelele wa gwedhwa po, otaku hokololwa kutya omulumentu ngoka ogumwe gwomaanona yatatu ya valwa elongo, nokwa zile koWalvis Bay.

Opolisi oya ti, ngoka e na uyelele na dhenge koonomola 081 3873 555 nenge 0818657404

– vkaapanda@nepc.com.na