Elelo lyondoolopa yaShakati olyi ipyakidhila okulongekidhila aantu ye vule 3 000 iilonga mondoolopa.
Elelo lyondoolopa yaShakati olya gandja oshinakugwanitha komahangano gokutunga omagumbo omashona, okutungila aakalimo omagumbo haya mono iiyemo iishona oshowo iiyemo yopokati, mboka ya ningi omayindilo gomagumbo mOshakati.
Mayola gwelelo lyondoolopa yaShakati Leonard Hango okwa ti otaya ka gandja omagumbo ge li 90 komahangano gokutunga omashona, ngoka taga ka pewa ashike omagumbo gatatu kehe limwe.
“Omagumbo ngoka otaga ka tungwa kEhenye Extension 11 oshowo 12, hoka twa longekidhila ko aakalimo mboka ye na iiyemo iishona oshowo yopokati,” ta fatulula ngaaka.
Hango okwa fatulula kutya omahangano ngoka taga ka tunga omagumbo ngoka, oongoka omashona opo taga koko, ihe kage shi ngoka omanene okugandja wo oompito ndhiilonga kukehe gumwe.
“Otwe ya po nedhiladhilo ndika oshoka otwa hala oshigwana ashihe shi mone oshipambu okulya ko koshikwiila. Omagumbo ngoka kwa li ga tungwa mOshakati okwa li ga tungwa ashike komahangano omanene,” ta fatulula ngaaka.
Ta gwedha po kutya, omahangano ngoka kwa li ga mono ompito ndjoka oshikando sha zi ko, itaga ka talika nando pethimbo ndika. Mayola ta ti, omagumbo ngoka otaga ka tungwa komahangano omashona ge li 30, ngoka ga kala ga ninga nale omayindilo melelo lyondoolopa yaShakati oyo taya ka talika.
“Otatu hogolola omahangano ngoka ga kala ga ninga omayindilo, kutya ngele opwe ya ompito ya tya ngiika, naya talike wo, sho osho shoka ta tuka ninga,” ta popi ngaaka.
Ta ti, itaya ka gandja nando ompito kaatungi mpoka opo taya ka uluka ko omitse paife, ano opo taya ningi omayindilo paife.
“Omahala ngoka agehe kumwe twa longekidha oge li 256, moka tamu zi 90 ngoka taga ka tungwa komahangano ngoka omashona,” ta fatulula ngaaka.
Ta gwedha po kutya natango shika oye shi ningi nelalakano lyokukandula po uupyakadhi woompito dhiilonga moondoolopa.
“Otwa hala kehe gumwe a kale e na sho ta longo mondoolopa yetu, opo a mone po ngaa she shokulya, nonando kasha shi oshiyamba,” ta ti ngaaka
Ta ti, okupitila momukalo moka, omahangano ngoka natango otaga ka kuta wo aaniilonga.
– vkaapanda@nepc.com.na