Elelo lyondoolopa lyaShakati olya kumagidha aakalimo yalo opo ya hulithe po okuteta po omiti mondoolopa, oshowo oku ekelahi iiyagaya kehe pamwe. Omunambelewa omukuluntu gwokugandja omauyelele Katarina Kamari okwa ti, kehe ngoka taka longa iilonga yi li ngaaka na lopotwe koombelewa dhawo opo a katukilwe onkatu.

Ta ti omiti ohadhi dhana onkandangala mo mikalo ndha yooloka, nodha simana wo monkalamwenyo yo muntu kehe. “Omiti ohadhi opal eke oondoolopa, ohandhi gandja ombepo no hadhi koleke uundjolowele womuntu,” ta ti ngaaka. Kamari okwa kumagidha oshigwana ta ti, nashi kale oshinakugwanithwa sha kehe gumwe okutsika omiti.

“Ota tu kumagidha wo natango oyene yiimuna hayi kala mokati kondoolopa opo ya kale taya kongolola iimuna yawo, kaayi we mokati kaantu,” ta indile ngaaka. Ta ti, iimuna otayi vulu oku eta iiponga una tayi taaguluka komeho giihauto. Ta gwedha po kutya ihayi ulike ethano ewanawa mondoolopa.

Kamari natango ota kumagidha oshigwana shi lopotele elelo lyondoolopa una sha tsakaneke ominino dhomeya dha topa moondjila nenge kehe pamwe mondoolopa, opo dhilongwe meehendelelo. “Uuyogoki owa simana onkene oshigwana oshi na okukala tashi opaleke omalukalwa gasho oshowo omidhingoloko dhasho opo kuyandwe omikithi tadhi vulu okupitila moongaga,” ta popi ngaaka. Ta kumagidha oshigwana shaShakati kutya, nashi kale sha tula uuyogoki komeho.

“Onda inekela kutya kehe gumwe okwa hala ondoloopa ndjika yi hume komeho, pamukalo gwomayakulo gayooloka, ihe shoka otashi ningwa ashike uuna ondoolopa ya yela, oshoka kape na ngoka ta hala, oku eta ehumo komeho mehala lya gagala,” ta ti ngaaka. Ta ti, uuyogoki otawu kala po ashike uuna, kehe gumwe tewu simaneke noku wu tula miilonga.

“Ondoolopa otayi kala ombwaanawa uuna ya yela,onkene otandi, tsikile okukumagidha oshigwana shaShakati shi kaleke po uuyogoki,” ta popi ngaaka. Kehe ngoka taka tsakaneke ayihe yazi noku tumbulwa nandhengele konomola 0812947119.

– vkaapanda@nepc.com.