Opolifi moshitukulwa shaZambezi otai kongo omalutu ovalumenhu vavali va kana eshi va wila momulonga Osoondaxa pefimbo kwa li tava tauluka omulonga u li keengaamba daNamibia naZambia.
Omupopiliko wopolifi moshitukulwa shaZambezi Inspector Sitali Kisco okwa hokolola ta ti ovalumenhu okwa li ve li vane eshi kwa li tava di koZambia tava tauluka omulonga va londa mokawato.
Okwa ti pefimbo kwa li ve li momulonga okwa ka dja omhepo ihapu fiyo okawato kavo taka pepwa po komhepo ndele taka wile momeva.
Okwa ti ovalumenhu vavali ova xupa eshi ve shi pondola okuyowa ashike ovalumenhu vavali ova kana eshi va wila koshi yomeva.
Okwa hokolola ta ti ovalumenhu va kanena momeva umwe Omunamibia omanga umwe omukwashiwana waZambia.
Okwa ti opolifi oye lipyakidila nokukonga omalutu avo ashike fiyo opapa kape na ouyelele kutya ovalumenhu ove li peni.
Ovakwapata vavo ova shivifilwa nale kombinga yoshikumungu eshi nomakonakono opolifi otaa twikile.
Okwa ti opolifi otai indile moshiwana kwaau ta ka mona omalutu ovanhu e li pomukunghulo womulonga ile a kaama kombada yomeva opo oshiwana shi lopotele opolifi diva.