Home / Ovanane Vombazu Hapo Vena Ousemba mo Mahi yo Vakwao? Ovanane Vombazu Hapo Vena Ousemba mo Mahi yo Vakwao?
I Kuvee Kangueehi OTJOMUISE Ovature va Pukiro na Tjinene mavevanga o Ministeri yOmahi nOmahandurisiro, nOministeri yOmananeno wOtukondua nOzongomainde, Omakwizikiro wOzondjuwo nOmekurisiro wOkozombanda okukahurura ombambaukire ndjatambuka pokati kozoresevate inda ohunga nomaunguriro wovirata vyozombazu mozoresevate inda nokutja uutira pi na uyanderepi. Ozoresevate inda kazena ongahukiro kutja omauhonapare wombazu wa Tjinene yena ousemba okupangura oviposa nokuyandja omahi movirongo rukuru mbyari vyo resevate ya Tjinene nu nambano mbyarira vyo resevate ya Pukiro kombunda yomatoororero wo 2004. Orata yOkarukondua kOmatoororero ka Pukiro, Brave Tjizera, matja omauhonapare wombazu wa Tjinene kayena ousemba mEpukiro mena rokutja mEpukiro muna omauhonapare wombazu ngena ourizirira imbwi. Tjizera waningirire omauhonapare wombazu wa Tjinene nawina Orata yOkarukondua ka Tjinene kOmatoororero, Nguvitjita Toromba, okutenga ehi ra Pukiro nokuhina kurirunga momananeno waro.Matja kapena okuungura omauhonapare yevari okukara nousemba mehi rimwe mena rokutja mapeya ihi atjiyeta omavetasaneno wovipara. Ouhonapare wOmbazu wOndjuwo yOuhona yOtjimaharero, kehi yOmbara Kaihepovazandu Maharero, oo uhopare wombazu mbwazemburukwa kotjiveta iyohoromende mOtjinene ngunda ouhonapare wOmbanderu kehi yOnganda ya Nguvauva a wazemburukwa mEpukiro. Posyo Toromba makambura kutja omikoka mbihana outukondua auyevari ibmwi ovyo polotika uriri kauna otjina nomikoka omauhonapare wombazu pumayeutire nokuyandera. Matja omauhonapare ngeri mOtjinene mayeyenene okupangura oviposa mEpukiro na wina okuyandja omahi. Matja kapena ombata kutja Epukiro rinanwa iyomberoo yOkarukondua ka Pukiro. Pupena ombata okookutja hapo omauhonapare wombazu ngeri mOtjinene nu ngena ovandu mEpukiro yena ousemba moveta okukara norupa movitjitua vyovandu vyawo. Toromba wasasaneke Ouhonapare wOmbazu wOvandonga natja nandarire kutja ouhonapare imbwi uri mOrukondua rwa Tjana, una o u semba wo kutara movitjitua mo tukondua twa Shikoto na Musati. Wa weza ko natja nandarire wa hakaena kuna ovaungure mo Ministere yOmaneno wOtukondua na raerwa kutja otjipetjitua mo tukondua tuare mehi no veta iyandjera. Ovature tjiva va Pukiro ko murungu wo mananeno wo mikoka mbiripo nai mbari kehi ya Tjinene nOuhonapare wa Maharero, nu nambano mbakonderwa mEpukiro, mavetja kavena kuriwisa kehi yo uhonapare wo Mbanderu wa Pukiro. Mavetja ovo vehungira Otjiherero tji tja hanika kuna Otjimbanderu nu munao otji mavevanga kutja vewe kehi yo u honapare wa Maharero. Tjizera ihi me tji nakaura a matja o maheya inga o makune wo hani. Matja pena ombangu onditi po kati kOvaherro nOvambanderu mbena eraka rimwe nu mbe kupasana. Otjinene yari Okarukondua ko matoorore kemwe ngunda Epukiro ari hiyapapururwa kuko nakerire oka rukondua ko matoororero kuko okeni mo matoororero wo 2004.
Your experience on this site will be improved by allowing cookies.
