New Era Newspaper

New Era Epaper
Icon Collap
...
Home / Ovarumendu Vakuuwa Kombongarero yEhinga

Ovarumendu Vakuuwa Kombongarero yEhinga

2008-02-15  Staff Report 2

Ovarumendu Vakuuwa Kombongarero yEhinga
"OTJOMUISE O Ministeri yOuveruke nOvitjitua vyOndunino yOtjiwana mainanga ovarumendu avehe mehi mozndengu zao azehe nu tjinene ovanane movito peke peke kombongarero yovarumendu yOndui yEhinga nEhinga omayuva tjiyeri 20-21 ku Tengarindi mOtjomuise. Ondando yombongarero indji okuyandjera ovarumendu okurihungirira ohunga nomutjise imbwi nokutara ourekotoko mokuritjurura korukatuko, okukakatera kepanga rimwe nawina okuungurisa okondoma. Wina ombongarero indji maipasana ondjivisiro womairo wokotjivetero naivyavanga omyano vyokutjurura, okupanga, okuhunga nokuyandja oruvara kwimba mbekondja nomutjise imbwi. Ombongarero yomayuva yevari indji maihaamene ponganda yomasekirisiro wovayenda indji o Safarri nu o Presidenda yehi Hifikepunye Pohamba meipaturura kotjiveta. ""Maihaama kehi yembo ehongonekwa ndimaritja: ""Ehinga Nondui yEhinga nOvarumendu va Namibia, oruveze rwahoro ete okusekama."" Mehungi kuna onganda yozombuze ya Namibian indji o Namibia Press Agency, ousupi o Nampa, Omutumbure wOkehi mOrupa rOvyungura vya Peke, Onganga Marcus Goraseb watjere: "" Tjimotara motjitamba tjouveruke, ovarumendu kavapaturuke okuryangera otuveze touveruke. Tjinene ovakazendu omberi ovapaturuke okuryangera otuveze itui. Matuvanga ovakazendu novarumendu okurira ovapaturuke nokuryangera otuveze itui."" Goraseb watjere ohoromende kundinondi okupitira mo Ministeri yOuveruke yayenena okuyandja omuti omuhande wouvere kovandu ape 40,000 mehi arihe. Ngunda amayandjero womuti imbwi ayauta mo 2002 mena rondjiviro ndjaripo oruveze indo, omuti imbwi watandererwe ovakazendu ovatumba kutja avehakapitisa omutjise imbwi kounatje. Kombunda mo 2003 wavasisiwa kovature avehe mehi mbumaveuhepa. Mozondiero zayo o Ministeri itara kokutjurura omasurumukiro wOndui yEhinga nEhinga nomatjururiro nomapangero waimba mbeutoora. ""Otja kondjiviro yetu yomavarero ndjitunayo ozoperesende o 30 uriri zovandu avehe o 40,000 mbehavara omuti wokuhanda ouvere omberi ovarumendu ngunda atuzuva kutja ouhara wovarumendu ombu handjaurisa omutjise imbwi,"" Goraseb watjere. Watjere mavevanga ovarumendu okuvetumbura nokuyandja ondunge ko Ministeri kutja ouzeu wOndui yEhinga nEhinga mauzengururwa vi mehi novarumendu otjimaveundjirwa pombongarero indji mowingi wao. Tjazumba ape ozoperesende o 70 zovarumendu mbehavara omuti imbwi wina vavera o TB okusasaneka nozopresende 30 zovakazendu. Otja komatarero wovavere ovahavare vomuti imbwi Goraseb watjere ozoperesende omurongo zovarumendu vata iyEhinga okusasaneka nozopresende mbari zovakazendu. "
2008-02-15  Staff Report 2

Tags: Khomas
Share on social media