Home / Ovisisiro vyo Visepa Mbindu ka Viyataarwa Ovisisiro vyo Visepa Mbindu ka Viyataarwa
"Kae Matundu-Tjiparuro OTJOMUISE Nandarire kutja omunavita wa taarwa o Namibia tjiramuna ongutukiro tjiyari 21 ku Seninarindi mo 1991, ovisisiro vyo visepa mbindu ngunda kaviya taarwa, Opresidenda Oitjavari mo makuruhungi wo Swanu ya Namibia, tjitjiri otjira otjitenga tjopolotika, Hitjevi Veii, matja. Veii ngwari umwe wovakamburwa motjovakamburwa tjopolotika oruveze rohuuire ya South Africa po Kakoverwa ka Robben, oumune imbwi we uyandjere tja riyarikiro nozondambo ze kotjovakamburwa ihi naatra wina kongaro yongutukiro ndinondi mehi. Yari po mawongero wo tjimariva peturo romerinaneno indi o Kovambo Nujoma Oritjatano ndazuko. Watjere ondunino vya imbi mo mbwiro na mo mbwiko mbya piramisirwe iyo huurire okupitira mo ma tunduuziro waimba mbaserwee kombunda no ma panginino wovazoozu mombwiko ka yeyakara novihape mbirivyo. ""Ngunda ondando yo Matunduuziro ya Mbaseerwe Kombunda no Mapanginino wo Vazoozu mo Mbwiko yari oku henununa ohendu ndjakwaterwe iyo mbangu yo huurire, omdunge yahakanwa iyo vanina museka vovazoozu mbahuurisa otjirwa kuna ovisepa mbindu tjitja haherwe."" Veii watjere o Swanu i paha ombwiro yaa vehe ovature vehi muvena oupaturuke wo kukara nehi, ouveruke nomerihongero. Posyo ndinondi mo Namibia ohani pokati ko vazoozu no vazoozu i nene parerako. Watjere kapena varwe vo vakamburwa ovakuru vo Kakoverwa ka Robben, pendje na Andimba Toivo ya Toivo ngwari novito peke peke vyou ministera, varora oku haama mo vito vyo horomende. Watjere oungombe otjira tjo Swapo tjimakuzu tjayandja kounepo watjo kauna wa vatera pupayenene. ""Nandarire otjimariva tjovarwe ovakuru katji yayenena okuhupa natjo,"" watjere. Veii watjere kavena kuningira okusutua mena ro hambwarakana yao kotjirwa tjongutukiro posyo mavevanga kutja ohambwarakana yao izemburukwe nu vevaterwe. ""Ndinondi imba rukuru mbari munda wohoromende yo huurire naverurumine metemba rongutukiro tjiriri poo kuvaza omba vyarera mu imbi mbyaa vepirura,"" watjere. Nandarire kutja wina vasere okuhavara otjikuhuna tjehi, ehi rasere okurituna kutja ovature avehe vehumbure. Watjere okakarata kotjira kakesere kurira otjipaturure atjiyerike tjomivero vyovyungura noviparure. ""Mena rokutja tuanakaura ehi otjira tjimwe mu matjihonapara natu rivangere ouyara wotjingi tjovira, tuasere okupandera pondunge ohuze indji yOnamibia Imwe yOmuhoko Umwe noyo ondjasere okurira oruhingo rwetu ndinondi na mo ruyaveze,"" watjere. Watjere ngunda ongaro pokati komihoko okwiisira kovandu mbeta moku pambaukwa nozondjima, nawina ovandu mbetakataka omatjangwa wombuze yo kuzepa ovavapa, ka iyarunduruka iri tjingeyo indji ndjaripo mu Tjitarazu mo 1966 tjakamburwa. Munao otjeri ohepero okuriyaruka okutara kovinenge vyo ngondjero yaimba mbe humbwa mo wini wao wehi."
Your experience on this site will be improved by allowing cookies.
