WINDOKO – Kasamulaho alikakalezo kuzwelela kwasisole sa naha Botswana, kuli mandui babane bane ba bulailwe kwamukulela wanuka ya Chobe nebana ni litobolo, mapokola banaha Namibia viki yefelile nebalumezi batuleli ba mwamezi, kuyotusa mwakubata litobolo zebulelwa. Zeo neli zibahalizwe kiyomuhulu wa sipokola Sebastian Ndeitunga, yana zibahalize hape kuli sikwata sa babatisisi babalalu sesi etelezwi ki mubakweli kumuzamaisi wa sipokola Sydney Philander, nesi ilo fita hande mwanaha Botswana, kuli siyo tusa mwalipatisiso. Bamulao mwanaha Botswana babulela kuli litobolo zebulelwa neli wezi mwamezi fasibaka sa kezehalalo. 

“Kacwalo, lulumezi sikwata sa banweli mwa Botswana kuyotusa kubata litobolo zebulelwa. Seni bulelezi sikwata saka ki kuyo isa maikuto pili kwa litobolo zebulelwa,” Ndeitunga nabulelezi New Era. Namibia ni Botswana balumelelani kueza patisiso hamoho, kufumana liseli kwakukunupa kwa masole banaha Botswana, kone kutisize mafu amandui banaha Namibia, ni muhabo wanaha Zambia. Bana bamutu alimuñwi, Tommy walilimo ze 48, Martin walilimo ze 40 ni Wamunyima Nchindo walilimo ze 36, ni membala walubasi Sinvula Munyeme walilimo ze 44, nebakunupilwe kimasole banaha Botswana la 5 Njimwana, kwamukulela wanuka ya Chobe. Mahe baana babalalu Alphonsina Nkungano Mubu walilimo ze 69, niyena natimezi kakukulubelwa kuli nakulile pilu. 

Nebailo bulukwa kwa Impalila Labubeli, mi muhabo bona nailo bulukwa mwa Zambia. Lubasi ni lipaki bapihelela kuli babane nesi bazumi. Taba yeo itisize misunga mwahala linaha zepeli, mi bamulao mwanaha Namibia neba bizize muyemeli wanaha Botswana mwanaha Namibia Batlag Serema. Bayahi banaha Namibia nibona neba cauzi mwa Windoko, Rundu ni Katima Mulilo, kulwanisa mulao wanaha Botswana wakukunupa ni kubulaya, mi lipiho libulela kuli bakeñisa mulao wo, batu ba 37 sebatimezi kuzwelela naha Namibia ha ilukuluha. Baeteleli kaufela balinaha zepeli Hage Geingob, ni Mokgweetsi Masisi bakupile kozo nikuli patisiso iezwe kapili. Geingob viki yefelile naize bane babana ni mulatu bana ni kufumanwa, mi naekelize kuli kubulaya bayahi babasina mulatu hakuna kulumelelwa.