Ozondekurona zOtjiṱiro Otjindjandja pouṱiṱi nounyaṋu wazo inḓa nḓa vazere mOtjozondjii tjiyari 25 ku Seninarindi, za kondjero kutja omazemburukiro oyetja 16 wa imba mba ṱira morumbo rwohangauti, aye ha kapita tjo.

Nomambo omatwe kozohoromende azeembari, ya Namibia noyEhi rOvandoitji, ozo nḓu ze muna kutja za huurisa otjiposa tjombinḓu yovaṱi novakuru vazo. Naze raisa kutja ozo za mana ongamburiro muzo nu okuzamba ondjira komurungu okuhungama otutu pekepeke twozohoromende oturikuramene mouye okutwara ko otjiposa tjazo tjOtjiṱiro Otjindjandja, Omaningiriro wOndjesiro nOtjisuta i yohoromende yEhi rOvandoitji.

Mu mwa ri omazemburukisiro woMihoko Omikutasane kutja otjiungura tjayo tjonguturiro ya Namibia kai ya mana tjinga Otjisuta tjOvaherero, Ovambanderu nOvakwena tjOtjiṱiro Otjindjandja tjawo i yohoromende yohuurire yEhi rOvandoitji, ngunda atji ya hara omuhunga kaparukaze. Nowo nai ava pandjarisa ongamburiro mozohoromende azeembari ya Namibia nongwao yEhi rOvandoitji, ozo nḓe ya nonḓuvasaneno pokati kazo, ndji tjiukwa otjOruyano Rwapamwe. Posiya oro ndu hi notjiṋa nOtjiṱiro Otjindjandja tjawo nungwari.  rozonḓero zozohoromende inḓa azeeembari kuwo ozeni otja tji za kutwa ku nozonḓero zOvanamibia ovahungire vOtjindoitji. 

Mu nao omeho nambano, mu imwe yozongondjero pekepeke otji mave hwiririke moMihoko Omikutasane. Ndji ri ongondjero imwe yozondekurona, Jefta Nguherimo, ndja utire nayo mu Tjitarazu ombura ndja zuko poMihoko Omikutasane motjihuro oGeneva tja Switserland tja hitisire orutuu romutjemo. 

Momambo wazo wina ngu va tjangere kovimbakete mbi va kawondjere navyo momivanda vya Tjozondjii, ozondekurona za raisire kutja ombongarero yoRutu Orukarerere Rwa Mbaziriire moAfrika rOmihoko Omikutasane, indji Nguherimo ka yandjere orutuu romutjemo, tji mai haama rukwao ombura indji mu Ngarano moNew York mOmahi Omakutasane ya America, ozo atja ze zera kutja i ve puratene.