Kuluta nikuituta kuzwelapili kuyemiswa bakeñisa kuyekezeha kwabutuku bwaCovid-19 mwanaha kaufela. Liluko latuto neli zibahalize kuli baituti kuzwa mwasitopa samakalelo kuya kusa bulobañwi, ili babali mwapumulo yamaliha, bakazwelapili feela nilituto zapatakapata la 4 Muyana 2021. Baituti bao nebakile bafiwa pumulo yamaliha kuisa la 26 Sikulu. “Lulemusa belubeleka nibona kaufela kuli pumulo iyanduluzwi kuisa la 3 Muyana, mi baituti baswanela kukutela kwasikolo la 4 Muyana 2021. Maticele baswanela kukutela kwalikolo la 2 Muyana 2021,” Steenkamp nabulezi mwasitatimende viki yefelile.

Naize bakeñisa kuekezeha kwabutuku bwaCovid-19 liluko neliboni kuli italime sinca kalenda yateñi. Baituti balitopa za10, 11 nizalituto zezwezipili baizi mwapumulo yafapelezo kakulatelela mulao otalima zamakete kanako yabutuku bwaCovid-19. Baituti nebaswanela kukalisa lituto zapatakapata la 19 Sikulu, kono likolo lilaezwi kusebelisa linzila zeñwi. Steenkamp nakenisize kuli baituti bao habana kukutela kwasikolo la 19 Sikulu sina mone kuzibahalalizwe, kono likolo neli laezwi kusebelisa linzila zeñwi kukala la 19 kuisa la 30 Sikulu. Baituti bao baka kutela kwasikolo la 19 Muyana 2021.

Likolo zakwamukunda zelatelela kamaiso yatuto yanaha Namibia, likupiwa kulatelela licinceho zeo. “Lulemuha kuli kuna nilikolo zakwamukunda zelatelela milao yeñwi, kono litaba zeo likana linyatisiswa kamo liinezi,” nabulezi. Litatubo zalitopa za11 ni 12 lika tateka la 15 Njimwana kuisa la 17 Ñulule 2021. Steenkamp naelelize kuli kuna nilisebeliso zeo maticele nibaituiti bakona kubelekisa mwanako ye. Nabulezi hape kuli likiliti neli filwe tuso yamasheleñi, mi hape likupiwa kulatelela milao yebona zabutuku bwaCovid-19 kaswanelo, yecwale kakuina mambala, kutina mamasiki hamoho cwalo nikutapa kwamazoho.