New Era Newspaper

New Era Epaper
Icon Collap
...
Home / RDP Oya Hala Omahogololo mEenhana Ga Undulilwe Komeho

RDP Oya Hala Omahogololo mEenhana Ga Undulilwe Komeho

2008-03-14  Staff Report 2

RDP Oya Hala Omahogololo mEenhana Ga Undulilwe Komeho
"WINDHOEK Ongundu ompe yopapolotika, Rally for Democracy and Progress (RDP) oya nyola ombapila kuMengestrata pEenhana tayi pula omahogololo gopashikandjohogololo ngoka ga thanekwa okuningwa eti 28 Maalitsa 2008, ga undulilwe komeho, tayi ti ope na omambandameko, omandangalati, omapiyaganeko nomiyonena tadhi ningilwa iilyo yawo. Mombapila ndjoka ya nyolwa kuAmushanga gwongundu moshitopolwa Ohangwena, Josef Halueendo, momasiku 10 Maalitsa, oRDP otayi ti ongundu ""otayi gandja enyenyeto opo omahogololo ngoka ge li ko eti 28 Maalitsa 2008, ga kalekwe sigo iilonga ayihe yomiyonena ya monenwa eyamukulo nokukaleka po ombepo ombwanawa koongundu adhihe opo dhi vule okuninga iigongi yadho nemanguluko."" Ongundu yoRDP oya totha mo iiningwanima itatu yeyonagulo lyuuthemba wawo mOshikandjohogololo Eenhana. Iiningwanima mbyoka aniwa oya kwatela mo epiyaganeko lyiigongi yawo yopapolotika. RDP otayi ti iikandjohogololo otayi tsitsimikwa okukeelela einyengo kehe lyoRDP momikunda. Ongundu otayi ti yimwe yomiiningwanima oya ningwa pokati komasiku 3-7 Maalitsa. Oshiningwanima shotango osha ningilwa aniwa pOnambutu, mpoka engungo lyaantu ya geya lya kwatelwa komeho kuPatrick Nghishidimbwa kwa li lya keelele iilyo yoRDP kaa yi ninge iigongi moshitopolwa shoka. Oshiningwanima oshitiyali osha ningilwa aniwa pomukunda Oshangu, moka mwene gwomukunda ngoka, Kambwali Nghikambe, aniwa a lombwele iilyo yoRDP kutya ye okwa pewa elombwelo okuza kEenhana kutya oRDP inayi ninga nando iigongi yayo momikunda dhawo. Aniwa kaye na okuninga oshigongi momukunda moka okuninga shila taya pewa epitikilo lyopambapila okuza kElelo lyaNdongoa lyOpamuthigululwakalo, nepitikilo oli na okupitila muMalangu. Oshiningwanima oshititatu osha ningilwa aniwa pomukunda Omishe, mpoka aniwa ongundu yaayambidhidhi yoSwapo ye li mohauto yo4x4 ya kala ya landula iilyo yoRDP nokupaakinga popepi naampoka kwa li pe na okuningilwa oshigongi koRDP. Aayambidhidhi mboka yoSwapo oya kala aniwa taya hiki oongalo dhawo mohauto muule. Ongundu yoRDP natango otayi ti omapiyaganeko nomiyonena dhika otadhi ningwa aniwa sha za komalombwelo gaNgoloneya gwaHangwena, Usko Nghaamwa, ngoka a ningile oshigongi eti 3 Maalitsa nokugandja omalombwelo ngoka kooyene yomikunda moshitopolwa. RDP ota ti Nghaamwa okwa lombwela ooyene yomikunda opo kaa ya pitike iilyo yoRDP yi ye momikunda dhawo; oshowo kutya naye ya tidhatidhe mo shampa ashike ye ya mono, oshowo kutya ooyene yomikunda oye na okutseyithila aanamikunda yawo kombinga yelombwelo ndyoka. RDP natango otayi ti Ngavena okwiindile wo ooyene yomikunda ya gane kutya yo oye li shili aayambidhidhi yoSwapo, naamboka aniwa ye li iilyo yoRDP otaya ka mona iilanduli. Mokupopitha iikundaneki pegumbo lye mOvenduka metiyali, omupresidende gwopakathimbo, Hidipo Hamutenya, ota ti omaihumbato gaNgavena kage li paveta noga nika uukiliminola. RDP otayi ti oyi uvite oonkatu dhaNgavena odha nika eyonagulo enene lyomauthompango geihumbato ge nasha nomahogololo taga ningwa kaayambidhidhi yoSwapo moshikandjohogololo shoka. RDP otayi ti kutya Ngavena oku li pambambo noonkondo dhe oshoka omukalo ngoka a longitha okupopya naantu mboka okwe shi ninga ongangoloneya, oshowo omalombwelo ngoka a gandja kooyene yomikunda oga talika ko ga za kombelewa onene moshitopolwa ndele kashishi ashike eikongelo lyomawi kongundu yoSwapo. Ongundu ompe otayi ti Nghaamwa okwa li e na okugandja omalombwelo ngoka kooyene yomikunda poshigongi shOngundu yoSwapo. RDP otayi ti oya lopota omiyonena dhoka kOmukuluntuwiliki gOmahogololo. Kakele, omolweyamukulo inaye li nyanyukilwa, ongundu kayi na po ompito yilwe ihe oyi na okuya komeho nekatukonkatu yilwe molwaashoka ethimbo olya pwa po omanga omahogololo inaga ningwa. Onkee oRDP oyi uvite kutya omahogololo ngoka itaga ka ningwa pamukalo gopauyuuki nemanguluko oshoka iigongi yokwiikongela omawi mbyoka yi na okuningwa omanga omahogololo inaga ningwa tayi piyaganekwa. Mengestrata pEenhana ina vula okumonika metiyali opo a tye sha komanyenyeto ngoka oshowo Ngavena Nghaamwa. "
2008-03-14  Staff Report 2

Tags: Khomas
Share on social media