Minista guunamapya omeya netopolo lyevi Calle Schletwein okwa kumagidha oshigwana, opo aluhe shi lopota aanambelewa taya longitha uulingilingi okumona nenge okugandja omavi.

Schletwein okwa ti, okwa pititha omushangwa nguka konima a li a ndhindhilike omanyenyeto taga indjipala okuza moshigwana. “Kehe gumwe na kale a manguluka okulopota omatokolo inaaga pitikwa kuuministeli oshowo ge li mekwatathano nuulingilingi, oshoka uuministeli wetu ka wuna shoka tau holeke,” ta popi ngaaka.

Ta gwedha po kutya shoka otashi talelwa momatokolo gali ga ningwa momutumba omutiyali, ngoka gwa nkondopaleke oompango nomalandulathano gomavi, tagu ithanwa “Second Land Conference of Namibia of 2018”.

“Ethimbo lyomutumba ngoka, okwa li kwa tokolwa kutya uuministeli woAWLR nawu kale tawu tala nawa nokuyalula pamulandu, etopolo lyevi oshowo kehe shoka tashi dhana onkandangala kombinga yiikwamavi,” ta fatulula ngaaka. Minista okwa kumagidha oshigwana shi kale aluhe tashi lopota uulingilingi. Ta ti, unene mboka ye na uuyelele wiihwa po naya kale taya lopota opo iilonga yatya ngaaka tayi ka keke uuministeli wuunamapya yi hulithwe po.

“Ngele ope na aanambelewa taya longo iilonga yatya ngaaka, taya futwa kaashili paveta nenge tayi iningila omauwanawa yo yene, nashi lopotwe meendelelo,” ta ti ngaaka.

Ta gwedha po kutya uuministeli itau ka pitika nando iilonga yatya ngaaka yi holeke noyi tsikile. “Kehe ngoka taka gandja uuyelele ye okuna uumbangi, neshi ninge pamukalo gokushanga. Ombapila nayi kale yina uukwatya womushangi awihe ye na shayina pombapila mpoka ashanga,” ta kumagidha ngaaka. Ta ti, ekutu nali kale lya patwa nawa, eta li falwa kombelewa yaminista momatungo omape guunamapya koGoverment park, mOvenduka.

“Kehe ngoka te tu yambindhindha nuuyelele awihe womondjila pamukalo twa zi noku tumbula, otaka pandulwa natango momukalo ngoka a tumu nago, noku tseyithilwa kutya uuyelele we owathika moombelewa dhetu,”ta popi ngaaka.

– vkaapanda@nepc.com.na