Hamushangandjai wongudu yoSwapo Sophia Shaningwa okwa ti ombuto yoCovid-19, inai denga ashike eengeshefa dimwe moshilongo nepangelo, ashike oshikefa shongudu nasho yo osha ehamekwa.
Edi Shaningwa okwe di popya pefimbo kwa li ta patulula pambelewa ombelewa yoSwapo kuyele oshivike eshi, komukunda Endudja moshitukulwa shaHangwena.
Shaningwa okwa ti Swapo okwa li e na eengeshefa tadi ende nawa manga kwa li moshilongo ina mu monika oCovid-19 ashike paife eengeshefa ihadi ningi vali oshimaliwa ngaashi shito. “Omudo wa dja ko okwa li nda ka tala omavalulilo eembaanga dongudu ashike okwa li nda kumwa unene eshi nda mona kutya mboli moshikefa shetu kamu na vali oshimaliwa shiyamba. “Eengeshefa dihapu oda pata paife, ovanyasha ova kanifa oilonga sha hetwa konghalo yombuto yoCovid-19 ei ya tukuka mounyuni aushe,” Shaningwa ta ti.
Ta ti onghalo ei oya piyaaneka yo omangeshefelo mOshikango oo a shuna pedu nodoolopa oyo paife kai na vali ovanangeshefa vahapu ngaashi nale.
“Omahooli okwa ninga ondilo paife, ondado yoikulya nayo oya londa onghee eshi oshi li sha kuma ovanhu ve na oyuuyemo ili pedu shaashi itava dulu vali okulanda oikulya eshi ya ninga ondilo,” Shaningwa ta ti.
Okwa kunghilila oshiwana opo shi xulife po okulandula ouyelele woipupulu kutya epangelo ola nyengwa okuyambula po eliko loshilongo eshi la shuna pedu.
Shaningwa ta ti oshiwana nashi li kaleke kokule naavo tava popile ongudu yoSwapo mowii shaashi eshi otashi yandje efano lii kongudu yavo. “Ongudu yoSwapo ongudu yovanhu aveshe ei ya heta po elunduluko lakula nokukala ya heta po oukumwe moshilonga eshi paife ovanhu vomihoko da yooloka va hangana,” Shaningwa ta ti. Onghee okwa kunghilila oshiwana opo shi kale shina oukalata wokuninga oilyo yongudu yoSwapo opo ongudu i kale ina oilyo ihapu moshilongo. Okwa weda po ta ti oshitukulwa shaHangwena osho shimwe sha dana onghandangala ya kula pefimbo lekondjelomanguluko.
“Oshiwana kaleni mu na ombili nelongelo kumwe opo tu kale kei po ongudu yetu yoSwapo tai pangele moshilongo,” Shaningwa ta ti.
Omukwatakanifi wongudu yoSwapo moshitukulwa Shangwena Hafeni Hatutale okwa ti ombelewa ipe otai ka yandje omayakulo paife kovakwashiwana vopomudingonoko opo.
Okwa kunghulila oshiwana opo shi kale tashi talele po ombelewa ngeenge sha pumbwa oukalata wokuninga oilyo yongudu yoSwapo.