• November 16th, 2018
Login / Register

Sibaka samaikatulusezo samezi sifetuha matota


Aron Mushaukwa Katima Mulilo-Bukamuso bwasibaka samaikatulusezo sesiyahilwe mabapa ninuka ya Lyambai ili sesizibahala ka Zambezi Water Front and Tourism Park (ZWFTP) habuzibwi kakuli sekufitile silimo kuzuwa fone sikwalezwi swalelele kimuso, kasamulaho wa likakalezo kuli bazamaisi basona nebasapeti hande musebezi wabona. Kukwaliwa kwateñi nekusiile babeleki bamashumi asilezi basina misebezi. Muuso nosulile bolulelule wamasheleñi afita fa N$180 hala kuyahiwa kwasibaka samafitelo ni maikatulusezo, kono kuzwelela fakukwaliwa kwateñi bukamuso bwateñi busali mwasimbwi. Nihakuzibahala kuli nekufitile feela nakonyana kuzwa fakukwalelwa kwasibaka sale, muuso waketa yoo neli sibuabui wapanka ya zwelopili ya Namibia kuli atuse katengo kuli kapube sinca ZWFTP. Hanabulela niba New Era Muinasipula wa Katengo ka ZWFTP Frans Kwala naize tiyeho yakatengo katolopo ya Katima Mulilo yakushimbulula mubu one kaneulezi ba ZWFTP kasilimo sa 2003, kiyeñwi yalisitataliso zetisa kuli ZWFTP ipalelwe kuzwiseza pata sibaka sale, nihakubonahala kuli sina miyaho yeminde. “Mubu isali wakatengo katolopo. Kacwalo mubu wale hausikafiwa kale simubuso, luselubulezi nibona lulibelezi feela kubona. Kifona fona fone lungangami kakuli miyaho kiya ZWFTP kono mubu kiwa katengo katolopo,” nabulezi. Kwala nahatelezi hape kuli kusaba nikamaiso kubisa tata kutatulula lika kaufela, kono natiselize kuli taba yamubu haikatatululwa ikaba muhato omutuna kuya mwalineku leliswanela. Nekupalile kufumana kalabo kwa katengo katolopo kakuli lipuzo zene lumezwi kubona Lamubulo viki yefelile nelisika alabiwa.
New Era Reporter
2018-02-12 11:00:06 9 months ago

Be the first to post a comment...