Home / Sikolo sa matakanyani sifumana malambi Sikolo sa matakanyani sifumana malambi
Aron Mushaukwa Itomba-Sikolo sa Ikaba Combined School, ili sesifumaneha libima zemashumi alobapeli mutulo-upa watolopo ya Katima Mulilo mwa sibaka sesitibiswa kimezi amunda sa Kabbe ya Mbowela, nesifilwe malambi amwanda asebelisa masola kuzwelela kwa Liluko la Mikoti nimulilo wamagesi Labubeli. Hanabulela kanako yakufa malambi, Mubakweli kulikwambuyu wa Liluko la Mikoti nimulilo wa Magesi, Kornelia Shilunga, naize kulekiwa kwamalambi nekukonahalile katuso yakatengo ka Electricity Control Board (ECB) mi malambi awo akabapala kalulo yetuna hala kutusa banabasikolo kubala nako yabusihu. “Lumitiselize malambi kuli muto asebelisa hande, nikuli mukone kunanula mayemo asikolo sa Ikaba mwa sikili sa Zambezi ninaha kabupala,” nabulezi. Kuekeza famalambi sikolo nesiamuhezi cwalo sibeelo sakubatisa lico sesisebelisa masola, hamoho cwalo nimacwe amalalu, nimasola amalalu. Shilunga naize “zeo neli zaswalelele” sina muuso haulela kuisa malaiti kwalikolo kaufela zamatakanyani mwanaha kaufela zefita famyanda yemine pili silimo sa 2020 sisikafela kale. “Muuso una nibuitamo bwakuisa malaiti mwalibaka zamatakanyani mi lukabona kuli sikolo sa Ikaba Combined School nisona sifumana malaiti. Luna nibuitamo mwamulelo wakutisa zwelopili wa Harambee ili wakuisa malaiti kwalikolo kaufela, ni Ikaba cwalo, pili silimo sa 2020 sisikafela kale,” nekubulezi Shilunga. Banabasikolo nebapalezwi kupata tabo yabona kasamulaho akufiwa limpo. “Luitumezi hahulu kuzeluamuhezi kakuli kukalutusa kubala busihu ili kuli linepo zaluna licimbuke. Lwaitumela kwamuhupulo omunde mi lukasebelisa malambi mwanzila yelukela,” nekubulezi muituti wasitopa sa bulishumi. Sikolo sa Ikaba sina nibaituti babafitelela myanda yemibeli, mi nihakubonahala kuli sitalimani nimatata amañatañata awo likolo zefumaneha mwalibaka zamatakanyani litalimana niona, aswana sina kutokwa malaiti, maino, nizeñwi cwalo, mwalilimo zakwamulaho sikolo nesinze sieza hande mwalinepo zasitopa sabulishumi mwasikiliti.
Your experience on this site will be improved by allowing cookies.
