Home / Siwombe takara ngorooro hompa govakwangali Siwombe takara ngorooro hompa govakwangali
Hompa Eugene Siwombe Kudumo gomuKwangali simpe ngorooro nakara Hompa govakwangali, yimo ana kutanta munasipundi gondango zaHompa gerero lyaUkwangali, munekuto Christian Shimuketa.Shimuketa kauyungire nonkango edi kamukwatereremo munasipundi gondango gwanare Munekuto Joseph Kandjimi, mepongo eli kavazigidire vanambudi. Egendeso lyorudi simpe kuna kugava mbudi zouhunga asi Siwombe yige hompa, kapisi vatambure nombudi dina kuzuvhika asi vamuhagekesa dina kara asi kapisi usili. Nombudi dangesi kapi dina kara nousili ntani kuna kupukisa vantu, yimo ana kutanta Shimuketa.Age kapere nye vatungimo moukwangali asi mbara ntani mberewa zorudi, ezi vatanta asi dapata, simpe kuna paturuka kwankenye gumwe. Age munasipundi katente asi awo kwatungika Siwombe kukwama nongendeseso doVakwangali ntani vasikisamo veta zomagendeso gorudi sintokorwa 25, 2000. Mokuwkama venta zonondango dopampo, veta zomo 2000,hompa kutanta asi yige gakahurako monkarapamwe ozo pweyi yompo, kowo apitisire kukwama sintokorwagona zaune(4) soveta zomapangero gorudi. Kambunga kamwe nye aka ana kugendesa munekuto Sevelinus Siteketa, nawo vatunda moUkwwngali vezimo lyouhompa, awo kuna kurwanesa uhompa waKudumo. Kudumo kwamutungikire asi Hompa mo2015, kutunda tupu apa vadogorokere ozinakuru Hompa Daniel Sitentu Mpasi mo2014. Nampili ngoso gumwe gosilyo sanare sondango zouhompa, Sevelinus Siteketa, age kuna kurwanesa nye uHompa waSiwombe kutunda tupu apa vamuturamo, nononkango asi awo kwahorowora Kudumo vahana kukwama ngendeseso. Age kuna kutanta asi vakwangali wovakurona vahepa kutwara madina gane vagahese mogo mazimo gouhompa gane, yipo nye ngano pwakatunda ogu napinganena mwanakufa Sitentu.Moomo gayimwene ngoso Siteketa yipo gatjenge mbapira zize kwaMinistera gonomukunda nepangero lyonomukunda Major-General Charles Namoloh(Rt). Moutatu womazuva 15 Murongankuru, nombunga nadinye edi mbali kwakamonekere kompanguro zonene, omu vahere kukatara asi yilye po mwene ogu una wapere uhompa ou, nye mpanguro kavakazirundwilire dogoro mo 8 Nsinano 2017. Nye nampili ngoso, mokukwama Kandjimi, mpangura kwapa hena nonkondo ministera godoropa nekuliko nomukunda doponze zodoropa Sophia Shaningwa akare mpita katji ntani gahepa kutokora asi yilye nakara hompa goVakwangali. Mononkango daKandjimi, Shaningwa katokwere asi Eugene Kudumo Siwombe yige hompa govakwangali, morwa vakwama ngendeseso nazinye, ntani nakufa hompa Sitentu kwamutumbwire asi yige ngapinganena mevango lyendi. Mokukwama nongendeseso detu kapi atutura ehoroworo, lyokuhorowora hompa. Ngendeseso zetu nomapuliro getu kapi tatugatjindji nampili nakauke. Yimo ana kuyahulisa ngoso Shimuketa.
Your experience on this site will be improved by allowing cookies.
