Mile 10 - Ncagcu sure ezi zakara asi zelipakerero momukunda horowero gwaKapako, moKavango zoutokero moutano kaupwireko kazigwene nonkondwarongero dokusika kwane ntani evango nye lyokupungura yiruganeso yawo yosure kepangero lyosirongo saJapan.
Morwa nonkondwarongero nye detu edi dakara asi kwazura, vanona vetu vamwe kuvarongera motende ano ava vamwe medi lyositji. Yipo nye morwa mukaro nye gwangoso ose yipo twatameka kupapara nombatero, vayatuvatere mokuyatunga nonkondwarongero yimo ngoso ana kutanta mukurona gosure ezi Jonahennes Litwayi, mosiruwo oso kasikere sokugava nonkondwa rongero edi paveta.
Ose kwapapara nombatero edi kono kampani dokulisigasiga, nye kapi yatutompoka. Nye yiyo nye twayagwene magano asi twahepa kupura epangero lyaJapan eli lyavatera kupitira momberewa zawo zomukarelipo mosirongo setu. Morwa konda nye ozo hawe oso kuna gwana nye nayina nonkondwa rongero ne ntani evango lyokupungwira yiruganeso yetu.
Epangero lyaJapan kwagava yimaliwa yokusika ko N$836, 141.75 kosure zaNcagcu zelipakerero mokwedi kwaFebruary. Ame kunatanterenge asi vanona wokusika ko 145, womontambondunge zokuhowo nezi zauvali, vana kara asi kuvarongera mositji ndi asi vanzi unene vakara monkondwa zawo, yiwo nye ngesi vana kukaza mononkondwa odo donompe, yimo ana kutanta mukarelipo gosirongo saJapan MoNamibia, Hideaki harada.
Ame kuna hafa moyimona eyi asi kutunda nayina, varongwa wosuere ezi zaNcagcu navenye tavakara mevango lyokulirongera lyewa. Yimo ana kutanta Harada. Kuna kara mulyo mokuzigidange name niyakare posilika sangesi somutaro, omu vana kugava nonkondwarongero donompe posure zaNcagcu.
Ose kuna kupandura epangero lyaJapan, omu vatambura vavatere sure zetu ezi, omu vayatunga nonkondwarongero edi yimo ana kutanta ngoso nguuru gomukunda Kavango zoutokero Sirkka Ausiku. Mpandu zetu kuna kuza kovantu wosirongo saJapan omu vagava Yuma eyi tuyatunge nosure detu edi.
Nonkarapamwe nye zomo mile 10, vanona vetu kapi navakara hena asi kunavarundike mononkondwarongero, awo ngesi tavalirongo nye naw moomu vavhulira morwa vanagwana mavango gokulirongera. Yimo ana kugwedako Ausiku. Sure zaNcagcu kwazidika kutunda mo1973, ano ngesi kuna kara nonontambondunge kutamekera mo 0 dogoro zomurongo. Kuna kara novarongi 26, gumwe munamberewa, ntani gumwe mukombi, kuna kara ngesi novanona wokusika ko 662 posure ezi.