New Era Newspaper

New Era Epaper
Icon Collap
...
Home / Tjipazu Otjiposa Pena Ombwiro?

Tjipazu Otjiposa Pena Ombwiro?

2008-03-14  Staff Report 2

Tjipazu Otjiposa Pena Ombwiro?
"I Kae Matundu-Tjiparuro OTJOMUISE Otjotjiri omundu ngokambure kutja Ovambanderu okuza kotjOtjombanguriro tjOkombandambanda otjikando ihi tjandje vahara omuhunga umwe nu varire omundu umwe? Epuriro ndaingana momuhoko okuiisira kokutja ngamba omuhoko kauyahaama pomuriro umwe nganda ondjakaha indji ayatambuka nu nandarire omuyaruke Ombara yOmuhoko Munjuku II Nguvauva ngunda naa keyakotora otjiwa notjiyanganpara komuhoko. Epuriro indi ohepero tjinene tjinga momuhoko amuna ekoti ndimuna kutja oveta yomuhoko oyo ndjiri omburo nondimwa yohani muwo, otjirumatua tjomuhoko okuza kOmbara. Wina epuriro indi marihongwa iyomambo ngeutuka morupanda ngetja kutja peya ye omunda umwe maukayenda novyungura vyawo vyomuhoko. Omuhoko Oritjaine ndimariyende otjimauyaruka kOtjombanguriro motjiposa tjawo nai tjitjahingi ozombura ape zarire ndatu ohunga noveta yomerinaneno watjo. Ovahungirire po vovimbumba aviyevari, Paul Kahorere, wOvanamitjemo na Uazenga Tjiposa-Ngahahe wOuhonapare mavetja okuzamba kutja otjombanguriro tjatjavi Ovambanderu vena omuhunga mbumavetoora. ""Ondjira ndjasewapo iimwe uriri ondjesirasaneno mena rokutja kombunda yotjiposa tjandje otjombanguriro tjoukohoke tjetuurukire ondjira,"" Kahorere matja. Matja nganduu kundinondi Ovanamutjemo veri kamwaha okupuratena no kuhungira kuna ovakwao posyo okoo kutja nai otjiposa tjitjiriko tjayarurakisiwa iyovakwao nowo kavena otjina okutjita. Posyo eye matja nganduu koiri oseinina veri kamwaha okuhungira. Ouhumandu mutu nambano kapena oiri oseinina tjinga otjombanguriro atjahukuka. ""Ndoovazu tuapandjara otjiposa okutja owete mbuturi posyo nu munao oputuasere okupahera ohange. Tjingetjo ovakwetu ndoovazu vataarwa wina ngavepahe ohange."" Otja ku Ngahahe-Tjiposa ovo vetjiwa kutja otjingi tjomuhoko oveta indji vayakura nu momirari mbirivyo. Ombara otja tjipasere okukara yatuako omunwe kembo uriri koveta indji. Munao otjivehina ohange noumune wa tjombanguriro kutja oveta ndjayakurwa iyomuhoko auhe nu ndjakayenda momirari mbirivyo kaiya yakurwa iyomuhoko. Posyo otjikando ihi okutuurungira mu Peter Nguvauva nguri inyangwe wetundu rOtjinguvauva, matja nandarire kutja ohorongo onya yatuara pi, omuhoko inongunde kumauyenene okutuirika ko omutuaro wawo. Nguvauva omwini watjoza ko natja omutuaro imbwi kanea kuuvereka kourike we otjongunde yetundu nomuhoko we nungwari ozondiero azehe mazepitire momuhoko. Uazenga matja otjina tjitjahana omuhoko oveta indji uriri nungwari mu imbi vyondungiro wawo owo waso kutja una ombwiro maukaenda pamwe komurungu nu kapena otjina tjima u uhana. Posyo Peter Nguvauva yiumwe ngeweekurira ouzeu wOvanamutjemo. Tjinene otjomutize wotjihavero tjOvambanderu. Matja otjihavero matjirihee otjini kutja Otjovambanderu pu mapehee kutja kangamwa Omumbanderu nokuhina mapesewa uwme pehi vasere okurira orupa romatiero watjo. Otja kuye ihi ngunda katjiyatjitua nu tjinene nene ""owo"" Ovanamutjemo kaveyazemburukwa mutjo. Munao otjivehina okuzemburuka kutja Peter Nguvauva omutize watjo. Matja ondjarira ombazu yomuhoko ozondiero ndehina omatiasaneno kuna omuhoko auhe. Omatiziro wotjihavero tjOuhonapare wOmbazu wOmbanderu Peter Nguvauva irimwe romapu otjombanguriro tjimatjitunu ko. Ondimwa yotjiposa ihi otjombanguriro mumatjitara okoo kutja hapo Otjombanguriro tjOkombanda tjari nawa moumune watjo wokutja omayakuriro woveta yomuhoko orupa rovitjitua vyOuhonapare wOmbazu nu munao otjiyasere kutja yapitira momirari nomazeva wovitjitua vyovyungura imbi otjovyungura vyohoromende. Ozohahende zOuhonapare wOmbanderu mbwa yarurakisa otjiposa ihi mazepatasanisa kutja oveta indji yayakurwa iyOuhonapare wOmbanderu amavetja yayakurwa iyOmuhoko nu munao otjiyehiyayakurirwe iyorutu rovyungura vyohoromende nu munao otjiyehasere okuwira kehi yomazeva nomirari vyotutu tuohoromende. Wina ozohahende mazepatasanisa kutja otjoveta ndjayakurwa iyOmbongarero yOmuhoko auhe otjiposa ihi katjisere kutja tja hungamisiwa Ouhonapare wOmbanderu. Munao otjimavetja mokuhungamisiwa Ouhopare wOmbanderu tjahungamisiwa omundu nguheri ye. Wina ozohahende mazepatasanisa kutja momahitisiro wotjiposa tjao Ovanamutjemo varaisa kotjombanguriro otja tjivasere kutja ongwaye tjimavetja oveta indji kaiyakurirwe kotjiveta. Mazetja omaraisiro nguvaraisa kayena oukahuke. Ouhonapare wOmbanderu utja oveta indji yayakurwa iyo tjiwana pombongarero yomuhoko auhe tjiyari etenga nayevari ku Seninani mOmauezonjanda mo 2005. Posyo tjiva momuhoko vepatasanisa kutja omuhoko wayakura oveta indji amavetja kanaa yapitira momirari muyasere okupitira iye iyekuyakurwa. Omirari imbi okokutja okomiti ndjatuwaperwe iyomuhoko okuungura otjiungura ihi yakasewa novandu outiti tjinga mombitasaneno tjiva awa henunuka muyo. Ombitasaneno indji yahinga nganda apekazikama otjimbumba tjitjiritja Otjinamutjemo. Orutjiva indui rwekurira ko momuhoko nganda wina ozorata tjiva zomuhoko mEpukiro, Otjombinde na Mongua azeisakewa kovihavero vyazo iyOuhonapare wOmbazu wOmbanderu. Mu Kozonyanga mo 2006 otjiposa tjitjaningirwa iyOvanamutjemo otjitjahaama mOtjombnguriro tjOkombanda Ovanamutjemo muvaningira kutja otjombanguriro tjitare motjina ihi otjo tjina tjohakahana nu tjingunda amatjivekutura kondjakaha indji nganduu tjimatjihaama okutara motjiposa moourekoto watjo. Ovo vaningira kutja Otjombanguriro tjiteze omayakuriro woveta yomuhoko nu itjinakaure nokutara wina komarambero wao movihavero. Wina vaningira otjombanguriro kutja tjiraere Ouhonapare wOmbazu wOmbanderu okuveyarura movihavero nokutja ouhonapare imbwi nOmujaruke Ombara yOmuhoko, Munjuku II Nguvauva, vesute otjimariva tjotjiposa ihi. Koruseinina vaningira kutja Otjombanguriro tjivepe onguturiro kangamwa ndjimatjimunu kutja ondjapwire. Tjiyari hambondatu ku Kambundu mo 2006 Otjombanguriro ihi otjitjatanaurira meraa ratjo omaitaverero wOuhonapare wOmbanderu nOmbara okuyarura ozorata inda movito vyao mombapaiziro yeho nganduu otjombanguriro tjimatjiyarukire otjiposa ihi poo kombunda yomatiasaneno. Otjombanguriro tjaraa kutja imbi ovyarwe Ovanamutjemo mbivaningira kutjo ngavingunda amavikurama omieze vivari okuza keraa ratjo okuundja kutja komatiasaneno mayeeta tjike. Wina tjaraa kutja omasutiro wotjimariva wotjiposa ihi yengunda amayeundju natjitja ovaningire kavena kungunda amavekaondja komurungu notjiposa mohakahana yaa ndjivari nayo otja tjivangingira kutjo. Tjiyari 26 na 27 ku Seninarindi mo 2007 otjiposa ihi otji tjakotoka kOtjombanguriro tjOkombanda nu momayandero watjo omupangure aturike oumune we motjiposa ihi nganduu tjiyari 13 ku Kozoyanga. Eyuva indi Omupangure Collins Parker otjayandja oimune we paraisa movingi vyarwe kutja Ombara yOmbanderu kaina ousemba wokukonda ongwa. Tjiyari 14 ku Kambundu ombura ndjazuko Ouhonapare wOmbanderu otjiwaraisa kotjombanguriro tjOkombanda kutja mauvanga kutja oumune womupangure Parker uyarukirwe iOtjombanguriro tjOkombandambanda. "
2008-03-14  Staff Report 2

Tags: Khomas
Share on social media