WINDOKO – Muongaongi wa Katengo ka United Nations (UN) mwanaha Namibia Rachel Odede, nazibahalize viki yefelile kuli katengo ka UN kaka neula mali alikana bolule bashumi kaba ketalizoho (N$15 million), kutusa batu babalikana 700 000 babanuhiwa kuli habana hande lico bakeñisa linanga leli taselize naha kaufela. Nazibahalize zeo kanako yamukopano wamukushuko nibalipolitiki zakwanda naha kwandu ya UN mwamuleneñi wa Windoko. Mukopano neli wakuzibisa balipolitiki zakwanda naha kuamana nikutalelezwa kwabuitamo bwakatengo kamukopano walifasi hala kutalima sinca katengo ka UN, nitaba yakutusa mwanako yalinanga. Naize katengo ka UN kana nimisebezi yakulwanisa linanga nitutengo twakutusa muuso mwanako yalinanga.

Hana bulela kwamukopano oswana, Mubakweli ku Likwambuyu wa Swalinaso ya Litaba Zakwanda Naha Christine //Hoebes, kakuyemela muuso ni batu banaha Namibia, naitumezi kwakatengo ka UN kwaneulo yeo. “Luamuhela tuso yetuna yeka nanula sizuma sanaha nikutusa batu banaha Namibia, sihulu babataselizwe kilinanga mi habana lico,” nabulezi. Mwakulikanyisa manzwi amuñoli wakatengo ka UN Antonio Guterres, //Hoebes naekelize hape kuli Namibia kakuba membala wakatengo ka UN iswanela kuzwiseza pata litaba zakusileleza mbyumbyulu kakufukuza lisilafazo ka 45 pesenti kasilimo sa 2020, nikufeleleza kasilimo sa 2050. 

Nabulezi hape kuli “Nibata kutalusa kuli naha Namibia ilumelelana nikatengo ka UN hala kutalima sinca zwelopili sina mwana bulelezi muñoli wakatengo. Namibia ilumela kuli kutalima sinca kuswanezi kungelela nikuba nibuikalabelo, kutokwa likunutu, nikutalima lika zakuzwisezapata zwelopili ni sifumu,” nabulezi. Nahatelezi hala buitamo bwanaha Namibia mwakubona kuli pono 2030 yakuhulisa sifumu yaezahala.

“Namibia isweli kusebeza katata kubona kuli milelo yazwelopili ikaezahala, ili yefumaneha mwamilelo yanaha kungelela cwalo nimulelo wa Harambee, mi luezize hande mwalikalulo zeñwi hala lilimo zelishumi zefelile,” nabulezi. Naitumezi hape kwabayemeli kaufela bakatengo ka UN nibabeleki kaufela bamuuso, kaswalisano yabona mwakutisa zwelopili mwanaha. “Hani hakanyehi kuli ona mukopano wo ukazwisezapata silikani saluna kuli milelo ya NPD5, Harambee, Pono 2030, Mulelo wakatengo ka AU wa 2063 ni 2030 ika fitwa kuyona,” nabulezi.