Home / Usakosa kavapatanene asi awo kapi vana lihameseremo asi vagwanenemo mauwa mokurandesa evhu Usakosa kavapatanene asi awo kapi vana lihameseremo asi vagwanenemo mauwa mokurandesa evhu
EVELINE DE KLERK Swakomund-Vatungimo modoropa zaUsakosa kuna kuhundira asi vakansela vawo vahepa kuvapa elimbururo ntani uministeli wonodoropa nekuliko lyonomunda, morwa kukwama matjingiso aga kavapwagesere omu vana kutanta asi kuna hara kurandesa evango limwe lyevhu komukurona pamberewa Reinhold Evenson. Momatjingiso, kagakere monosayitunga dopasirongo, sikondovike sina puko, Evenson kavamutumbwire asi yige murandesi ntani yige hena murandi, ana krandesa evhu olyo kukwateramo vakansela wodoropa. Mokutura nye elikwamo eli mwapeke, vakansela simpe kavamupere hena akare mwene ana kutambura nsene mogeli marwaneso nkenye kuhamena erandeso evhu eli. Mokukwama nye vatungimo, eyi kapi yina kumona nawa kwawo awo vatungimo modoropa ezi zaUsakosa, ndi asi vaNamibia tupu navenye, ava kavatjangwilire elikwamo eli asi kuna karamo elituromo lyovakansela, nokuhundira asi vansela vahepa kuhagekesapo elikwamo eli. Mbunga mpatanesi zopaveta mombongarero zanavenye, Popular Democratic Movement, nawo kavageve mbapira zawo nkera, omu nawo vana kupira kukwatesako elikwamo lyerandeso lyangesi. Mbunga zawo kazitente asi egano eli kuna retanye, malirwaneso pokatji kovatungimo ntani Evenson ogu vana kugazarera asi pana kara umbondo opo.Evenson kuna kuranda evhu olyo siruwo oso age mukwatelimokurona godoropa. Ntani nsene kweli ogu ana kugazara kugava runyegenyo kuhamena kevhu eli kuyigava hena kwendi. Eyi kuna kumuninkisa mwene akare mupanguli ntani yige hena motokoli gelikwamo eli, yimo ngoso zina kutanta mbudi zawo. Awo kavagwedereko asi malikwamo gangesi kuna kulikida nye omu vana kupukisa kuruganesa nonkondo dawo, unene wondango zodoropa. PDM awo kavahundilire nye Ministera gonodoropa Sophia Shaningwa, mokufaturura asi veta zondango zodoropa zapulisira mukaro gwangesi ndi hawe. Yipo nye ministera mokukwatesako Presidente Hage G. Gengob, mokurwanesa umbondo, atjange ewapukururo, veta ezi yipo ziwize koParliamente pangenderera komeho vantu vangesi vakalingawopeke pwavene. Mukurona godoropa Usakosa, Akser Mwafengayo katente asi elikwamo lyerandeso evhi eli moyimaliva yokusika N$202,000 kapi yina kulirwanesa noveta zondango zonodoropa nampili nakauke. Mokukwama kwendi age Mwafengayo, ndango zodoropa momvhura 2010, kwatokwere kurandesa evhu limwe kovarugani valyo. Nokugwedeka asi sinzi sawo nare varanda evhu lyawo nye Evenson, age kwageve tupu epukururo kokansela mo 2016, asi age ngesi ana hara nye kuranda evhu lina vanamutumbwidilire. Evenson kuna kumoneka asi age kwakara pevango lina nomvhura murongo pahehedo. Evenson kwakara asi yige mwanya nombapira adi wizamo nampili evango eli tuna kuuyunga ngesi. Mwafengayo katente asi Evenson kapi kakerepo apa katutulire etokoro eli, mo2010, ntani kapi yina kulikida asi ana lihameseremo pwaumwene. Mokukwama veta zonodoropa namesi kapi napulisira kupitisira elikwamo lyangoso. Yipo nye asi Edina lyendi kuna kuomena pavali murandi nomurandesi. “ Nye nsene kweli ogu ana kara nerwaneso nkenye, kukwama omu vayitjanga, metjingiso, owo navayirugana moomu yawapera.yimo ana kutanta. Awo vamwe kuna kuyimona asi kansela ngano kwapa muntu peke, ogu navhura kukara pokatji megendeso lyangeso, kapisi mwene hena Evenson. Mukurona godoropa katente asi awo ngondango zodoropa kuna kumoneka asi kuvhura nye vakakute mukurona pamberewa, momazuva 7 February, ogu nye vana kugazarera asi takagusa nye yirugana nayinye rambangako erandeso evhu lyomodoropa ezi.
Your experience on this site will be improved by allowing cookies.
