Mayola gwelelo lyondoloopa lyaShakati Leonald Hango okwa ti, okulongela kumwe nokutulilathanamo omayele oko ashike taku etitha ehumokomeho.
“Etso kumwe ndika olya nuninwa okulongela aakalimo yomiitopolwa yetu omauwanawa ga yooloka,” ta fatulula ngaaka.
Hango ta ti, ino shipondola uuna wa iningila ngoye mwene uuwanawa, ihe ino ningila ya kweni uuwanawa.
Ta gwedhapo kutya okwa inekela kutya uukumwe wawo mboka ya manga natango oshikando shika, otau tsikile nokutulilathanamo omayele oshowo nkene yena okuhimitha komeho oondoloopa dhawo.
Mayola gwelelo lyondoolopa lyaShakati Leonald Hango okwa li apopi ngaaka esiku omalelo goondolopa gatatu gomonooli Oshakati, Ongwediva oshowo Ondangwa kwa li ya shaininuna etsouvathano noCity of Windhoek.
Etsouvathano ndyoka okwa li lya shaininunwa nokontalaka yomimvo ntano, oshikando oshitatu, sho shotango kwa li ya shainwa mo2016.
Joseph Uapingene omupevi mayola moCity of Windhoek esiku ndyoka okwa ti, shoka itashi eta ashike uuwanawa wehumokomeho mondoolopa yawo, ihe nomoondoolopa wo ndhilwe.
“Okulongela kumwe okwasimana oshoka ohaku longathana nkene gumwe ena okukandula po omaupyakandhi ge li po oshowo shoka shina okuningwa po,” ta ti ngaaka.
Mayola gwondoolopa yaNgwediva Taarah Shalyefu okwa ti, omimvo ntano okuza nena otaya yalula uuwanawa wa holoka momalelo goondoolopa okupitila metsouvathano ndyoka.
“Shika natango ohashitupe omukumo tulonge twa itulamo oshowo nkene tuna okuwilika omalelo goondolopa getu ga humekomeho noga ete omalanduluko,” ta popi ngaaka.
Ta ti, oshi li shoka kutya omaupyakandhi gomomalelo goondolopa kageshi ku keelelwa, ihe ngele oga holoka ohaya kambandhala okuga kandula po.
Paavo amwele, mayola gwelelo lyondoolopa lyaNdangwa okwa ti, shika osha holoka pethimbo oshilongo sha taalela onkalo ondhigu.
“Oyendji oya zi kuusahyi yuuka koondolopa omanga yamwe yuuka koondolopa oonene taya kongo oompito ndhilonga oshowo omalukalwa,’’ ta popi ngaaka.
“Shoka otashi kalongitha omalelo goondolopa noonkondo okuyanda omaupyakandhi ngoka gaakalimo kaana omalukalwa, ga holoke,’’ ta popi ngaaka.
– vkaapanda@nepc.com.na