Uuministeli womindhingoloko iihwa nomatalelepo owa ti, nonando ehulithopo okundhipaga oompanda olyi li ko kule, itau hulitha po okudhi gamena opo uupyakandhi mboka wu shonopale ngele itau hulu.
Omugandji gomauyelele muuministeli womindhingoloko iihwa nomatalelepo Romeo Muyunda okwa ti, nonando uupyakandhi mboka tau tsikile, owa shonopala, okuyelekanitha nomimvo dha piti.
Muyunda okwa ti, nuumvo oompanda ashike 33 dha ndhipagwa kaashili pa veta, 9 oontokele omanga 24 oondundhe.
“Oompanda ndhoka dha ndhipagwa 33, ondho koofalama ndhii kalekelwa, ndhi li 9 okoofalama ndho paumwene omanga ndhi li 15 ondho mEtosha,” ta fatulula ngaaka. Ta ti, okuza omvo 2017 oompanda ndhi li 55 odha dhipagwa, 2018 odhi li 83, 2019 odhi li 57 mo mo2020 odhi li 42 omanga mo2021 mwa ndhipagwa ndhi li 44. “Ota tu tsikile okulonga nuundhiginini okugamena iiyamakuti ya gamenwa, kaayi ndhipagwe kaashili paveta,” ta popi ngaaka. Ta ti, shoka otashi ka kala oshipu uuna oshigwana tashi longele kumwe nopolisi, naatili oshowo aanambelewa muuministeli womindhingoloko okulopota iiningwanima yolundhi nduka. Muyanda okwa ti, oondjamba inandhi taalela uunene uupyakandhi woku ndhipagwa, nuumvo oondjamba ashike mbali dha dhipagwa.
“Okuza 2017 oondjamba ndhi li 50 okwa li dha dhipagwa, 2018 odha li 27, 2019 odha li 13, 2020 odha li 12 omanga omvo gwayi dha li ashike hetatu,’’ ta tothamo ngaaka.
Ta ti, omwaalu ngoka otagu ulike lela gwa shonopala, naashoka otashi ulike nkene aagameni yiiyamakutu taya longo ya itula mo. Omukuluntu gwokukondolola mEtosha Namandje Amunime okwa li a kumagidha oshigwana shi hulithe po okudhipaga iiyamakuti ya gamenwa mEtosha.
“Iiyamakuti ngaashi oompanda, oondjamba oshowo oongaka oonkalamwenyo dhawo odhi li moshiponga oshoka oyo unene hayi dhipagwa omolwongushu yiilyo yawo,” Amunime ta ti ngaaka.
Ta ti, nonande ope na egameno lya kwata miiti okukeelela iiyamakuti yi dhipagwe kaashi li paveta, natango oshigwana ohashi kambandhala okulongitha oompito adhihe, okukonda ooveta ndhoka.
“Otwa ndhindhilike kutya aantu mboka haya dhipaga iiyamakuti ya gamenwa, aanafaalama ye li unene moluhepo taya tumwa kaanangeshefa oshowo kaaniilonga aakuluntu yepangelo, yo taya ka futwa,” ta fatulula ngaaka. Amunime okwa popi ta ti, mo mumvo 2020, iipotha yi li 68 okwa li ya lopotwa mEtosha, moka mwa kwatelwa edhipago lyoompanda, aantu ya adhika nomayinga goompanda, nayamwe ye na omayinga goondjamba oshowo onyama yiiyamakuti yilwe ya gamenwa.
“Aagameni yiiyamakuti mEtosha omimvo dha piti oya longa nuudhiginini, oshoka omwaalu gwiipotha ya lopota ogwa shuna pevi, ngele tagu yelekwa niipotha yomimvo dha piti,” Amunime ta fatulula. – vkaapanda@nepc.com.na