2015-04-02Staff Report 2 WINDHOEK - Vakurupe nkera vana hafa asi mbudi ziongwa ezi kava zuvhira ana kugava Presidente Hage Geingob asi tavagwana egwederero koyimaliva eyi ava gwana nkenye kwedi. Ayo kuna yigwederera nonopersenta 40% yitunde nye po N$ 600 yize po N$1000. Eyi kava yigeve nokuvatara omu vana kumoneka asi awo vana hafa kupitakanena. Apa kavazuvhire mbudi ana kugava Presidente mosigongi sawo sokuhova sokabinete kasikereko nkera. Age katente asi ezeruro eli kuna wizire morwa ruhepo ntani egavero lyahepa kuwapa momunene. Egano eli twahalitara asi edona nye egano lyewa mokuvatera vakurupe vetu, yimo ana kutanta Presidente ogu ana kara ngesi momberewa mazuva gana siki komurongo. Vakurupe vamwe kavakere tavazigire ano vamwe awo kuna kusakerera morwa egwederero eli lyo N$400. Awo kavatente asi eli etungiko vanagwana lina kutunda kwaHompa Karunga. Ame nina hafa unene yimo ana kutanta Mina Swartz gonomvhura 80. Age katente asi 600 kwakere yimaliva yoyinunu, mokuyiruganesa nampili ngomu yakere asi age ngapeko vantu owo ngavamuvatere meparu lyendi. Swarts ogu gakara asi kwatunga mo8de laan, morukanda rwa Otjomuise, katente asi age kufuta 200 pevango eli gatunga. Nokuruganesa 200 zimwe konondja, ano eyi nye yimwe yiyo gatura nye yokutara asi yinke nayiwiza meparu ana pilire kundindira. Ame kuna kusakerera mawoko morwa Karunga ana zuvhu makanderero gange. Yimo ana kutanta gumwe mukurupe Majidt. Majidt age katennte asi age namukadendi kufuta embo lyawo ntani nomema nye aga avaruganesa. Awo ngavatwikira kukanderera Presidente ogu yipo asi akare nkenye apa ana kanguka. Meho getu kapi gana kupwa mokutara asi yinke narugana ogu presidente. Mvhura zina puko kapi twagwene egwederero nye hawe namvho tuna gwana nye eyi twandindira. Yimo ana kuuyunga Majidt komeho aturepo funguna zendi. Mbudi ngesi zoge nye okatantere Presidente gwetu asi ose kuna kara noruhafo kombudi zongwa ezi ana gava nayina. Ano gonomvhura 67, Hild Goagoses kapi kavhulire kuhoreka mahodi gendi koruhafo oru kakere naro. Goagoses ogu gakara asi age kuruganesa embo eli novantu wokusika ko 13, rambangako vana vendi novatekuru vendi katente asi Karunga muwa unene. Age katente asi posiruwo simwe age ngaranda nondja pomakongo yipo vantu vakara membo lyendi vaparuke. Ano omu nye yina kanduka ngesi hawe 500 zonondja ntani gwawo tanisigi nye kombanga yipo nitara asi udigu musinke nina kugwanekera nawo. Moyooyo agwana nare age kufutamo 115 zevango eli vatunga. Ntani yokuhupako kuyiruhanesa korutjeno noyihepwa yimwe yemembo. Ame ngesi nina hafa unene. Karolina Goagoses age katente asi yimaliva eyi nayimuvatera mokugwana nye ndi asi afute yimaliva yomukuli koBuild Together. Hawe ngesi kuna kumoneka asi ame nani vhuta nye embo lyange eli natungesi kupitira melikwamo lyobuild together. Vakurupe wovanzi kuna hafa eyi yina kumoneka asi elikwamo eli hambara vaturepo lyokuninka asi sirongo nasinye vakalyatere yipo vavape yimaliva oyo kapi yina kumoneka hena ngoso. Nomukunda nadinye tupu vana kupembura asi apa yina wapa nye. Ayo kuna kara asi mvhura ozo tavagwana 1200 woowo hena vakurupe. Ngesi tuna hafa nye kweyilina rugana epangero lyetu. Hawe nose ngesi tatu tara nye asi eyi kuyiruganesa yinke ntani yokuhupako. Rambangako vatekuru vetu nawo tavagwanenemo uwa mokuvaranderako yimwe eyi ava pilire kugwana pwanare. Gumwe katupulire aga kapi ana kuvhura kuuyunga kuna kutanta tupu asi mpandu, mpandu mpandu zelike ono kuzuvha. 2015-04-02Staff Report 2
