Home / Vameya Wokomuzogo Tavagwana Yipundi Yawo Vameya Wokomuzogo Tavagwana Yipundi Yawo
Mo Oshakati vakurona wonodoropa Oshakati, Ondangwa na Outapi kavavatengwidiliremo momavango gawo. Mukurona godoropa za Oshakati Katrina Shimbulu, mukwawo zendi gwa Ondangwa Naftali Andimba nogu gwa Outapi Matheus Ndeshitila kavagwene mavango gawo ntani nokukara asi vanasipundi wonondango doropa odo. Mo Oshakati, Henock Hilundwa kava muhorowere asi munona gwa meya. Nye kamumonekere malisinto nakauke mokomitiye zegendeso. Angelius Iyambo kavamupere evango lyendi lyounasipundi. Age kuna gwana mupevega gwendi Loide Shivolo ogu gakere asi mokomitiye zegendeso tupu. Linus Shiimi ana wiza mokomitiye zegendeso. Pwanare age kwa kere munasipundi gona mokomitiye zegendeso. Meya gwanare Engelbert Atshipara na Vaino Amuthenu vana kara tupu nye yilyo yo kansela. Apa kageve siuyungwa sendi setamburo meya gwa Oshakati Katrina Shimbulu kageve ruhafo rwendi omu vakansela vakwawo kavamuhorowere hena. Age katumbwidilire asi narugana moomu navhulira mokukulika doropa ezi ntani kureta ukumwe mondango zendi. Age kageve yimwe eyi zarugana ndango zodoropa dogoro ngesi. Age katente asi ndango zodoropa, yitundwamo yawo yoyimaliwa mo 2007/8 kwakara yomutaro. Awo vatwara ava ava randesa modoropa kevango lyewa lyakara pepi nomberewa zo va Angolo. Komuzogo gwa Oshakati ntaantani vaturepo sitanda, ntani yimaliwa yetu kuna kara mekeverero. Shimbulu, katente asi ndango zodoropa kuna pitimo noudigu unene mvhura ezi runa vagumu ruhanzo. Navenye vatungimo novanangesefa kwavaguma ruhanzo. Vantu noyiweka yawo kwavatwara kevango lyokukwateramo ko Ongwediva na Oshakati. Vanangesefa kwapata eyi yaninkisa va zumbanese yiwizomo. Varugani vamwe kwazumbanesa yirugana yawo. Age kapandwire navenye ava vapa yirugana yawo. Age kapandwire navenye ava vakambeka ko kuwoko vapopere ava rwaguma ruhanzo. Mokukwama mwendi ndango zodoropa zanyatera malizuvho kumwe nombunga zova nangesefa NCCI, kwedi kakupwire omu vana kupapara magano gokuvatera vanangesefa vawo. Age kahundilire vakansela vakwawo, vatungimo varuganene kumwe yipo vature magano gawo mouta wakora. Mo Ondangwa Letty Tuutaleni simpe yige Munona gwa meya. Ano yilyo yokomitiye zegendeso nawo kavagwene mavango gawo kumwe na Leonard Negonga ngomunasipundi. Omu vana kara ngesi Sem Nangolo munasipundi gona, Selma Namukwambi, Petrus Shituua yilyo, ano Priskilla Nashandi silyo. Mo Outapi Dokotora Ndamona Hainyemba simpe munona gwa meya. Ano ava vana kara mokomitiye zegendeso kuna kara Simeon Kavila, munasipundi, Loide Nehunga,munasipundi gona, Ignatius Mengela silyo, Johanna Indongo na Tobias Beata Kambishi yilyo.
Your experience on this site will be improved by allowing cookies.
