Easy access at the tip of your fingers, subscribe to our daily ePaper version of our New Era Newspaper.
Home / Vandovesi Kuna Kundindira Egano Twaromo Lyanamibia Lyounangesefa
Vandovesi Kuna Kundindira Egano Twaromo Lyanamibia Lyounangesefa
2008-07-24Staff Report 2 MoVenduka Vanangesefa womoNamibia vahepa kutura magano gawo gounangesefa ndi asi noprojeka edi dakuretamo yuma mosirongo. Eyi kayiwizire nye poruzera paapa sirongo saNamibia naNetherlands kavanyaterere malizuvho kumwe noEmerging Markets,moMandaha ganapuko. Mokukwama elikwamo olyo kampani zomoNederlands kuna hara kuruganena kumwe nonokampani domoNamibia. Ano mokurugana nye eyi kuna turapo nontambo edi novhura ndi nosikisamo yipo nove ohamene moprojeka ezi,ntani wahepa kukara gumwe ono kuretesapo yirugana,ono kuretesapo magano kuliko ntani kuna kureta marunduruko monsitwe. Apa vaperenge asi mukwatakanesi goyirongo eyi yivali ame kwatere asi vagara novakadi womoyirongo esi vahepa kupungura moyirongo eyi yivali. Yimo ana kutanta Consul Ger Kegge,gosirongo saNetherlands. Kegge katente asi eruganeno kumwe lyoyirongo eyi yivali ngesi kuna litete nye unene momarandesero nepungwiso. VaNetherlands kwanyatera malizuvho gokuruganena kumwe noyirongo yina siki ko50,monomvhura edi dina piti.eyi ana kutjangurura Kegge asi kwareta uwa unene meruganeno kumwe. Age katente asi elikwamo eli kuna kara ngesi moyirongo 49,noyimaliwa yina siki konomiliyuna 50 doEuros,mwankenye sirongo kuna kugwana nomiliyuna 1,5. Posiruwo nye oso mukurona gendesi gomberewa vana kutumbura asi National Planning Commission Professor Peter Katjavivi,ogu kanyaterere malizuvho kukwateramo epangero lyaNamibia ndi asi sirongo sendi,katente asi sihorokwa sangesi kuna wiza posiruwo sosiwa omu Namibia ana kutura egano twaromo lyendi lyekuliko (NDP3). Eturo mouta wakora NDP3,kuna pumbwa kutantera vanangesefa womonda navawoponze zosirongo,nsene asi tuna hara asi tuture usimbu magano aga moyirugana.Katjavivi katente asi elikwamo eli nonoprojeka edi kuna kuza dika vatere vanangesefa ava avarugana pwavene ntani nosirongo nasinye.Mokukwama NDP3,zetu yimaliwa yokusika konobiliyuna 8,7 dina kutunda ponze zosirongo kuvhura tuture nye egano lyetu mouta wakora.Ose kuna kugazara asi noprojeka dangesi dahepa kudigava unene konomukunda edi dina kumona kanyando.Yipo walye vantu vetu nava katunda mweyi vana kumona.Melikwamo eli Namibia kuna kukagwana yimaliwa yina siki ko500 000,yoEuros,moprojeka zimwe momvhura. Noprojeka edi nava pulisira kukwama omu vana tjanga egano twaromo lyawo.Ano magano twaromo gamwe tagakarumbasana noyirongo yimwe.Elikwamo lyangesi talikara lyonomvhura mbali nye kuvhura kukalitara hena asi litwikire ndi ngapi yimo lina kara elizuvho ngoso. 2008-07-24Staff Report 2
