Easy access at the tip of your fingers, subscribe to our daily ePaper version of our New Era Newspaper.
Home / Vapuli vamwe tavahetekereko komuporofete Bushiri
Vapuli vamwe tavahetekereko komuporofete Bushiri
2016-02-04Staff Report 2 Ntundiliro zomuporofete ogu govharerwa zaMalawi, Shepherd Bushiri kuna retesapo mapuro gomanzi kovaNamibia vamwe, unene kwava vakara nomapuliro peke omu vana kutanta asi ngendeseso zendi kapi yina kuliza nelikwamo lyobibeli. Bushiri karetere sitetu moNamibia, vantu wovanzi kavawizire ava vapira kuponga rumwe mosirongo esi. Ntudi wokuvhura kusikako vantu ava vakere pepongo eli lyokudiworoka sirongo apa samangurukire mo1990. Vatjangi nombudi kavakere vene tava tara asi mwene ogu muporofete gakara nomagano gamwene sili kwakara nongesefa mokugwana vantu. Sira soma udano koSam Nujoma kwakara nomavango gokusika ko 10 300, nye ava kava kere pwaBushiri kavapitiretepo. Nampili ngomu kayikere asi kazirokere mvhura, vantu kavatundire pepi nava kavatundire koure kavasikeme ngorooro omu navenye kava kere tavandindire asi yitetukisa yihoroke. Nye vamwe womapuiiro peke kuna kuyimona eyi namo peke omu tupu aruganesa uporofete wendi ntani yitetukisa. Ame epuro lyange kapisi yimo lyapura ngoso.Bibeli kuna kutanta asi twahepa kutura malisigo gopampepo ntani kupumba, nye vantu wovanzi kapi vakara nayo eyi yokufana ngesi. Yimo ana kuuyunga gumwe ogu gahageka sirugana saKarunga morwa ukurupe Ngeno Nakamhela. Nakamhela katente asi age kapisi gumwe ogu atara elikwamo lyaBushiri, omu audisa ndi omu aruganesa yiruganayendi yokuporofete nye kapi gakara negano asi nampo atare asi ngapi omu ayirugana yokuretesapo yitetukisa. Nakamhela age gongererka zaEvangelical Lutheran Church in Namibia. Age katente asi muporofete gumwe ogu atatanta asi yimwe kuvhura yikahoroke nye kapisi mononkondo damweme nye gahepa kutanta eyi ngano ana mutantereKarunga. Owo kwakara ngano vantu vatjanga mobibeli ava ngaruganesa Karunga ngava kara asi kapi ngavarugana yininke pwavene nampili nakauke. Musita gongereka za Africana Methodist Episcopal Maria Kapere age katente asi yisesu gadiva yokuhamena muporofete oguo Bushiri, pwamene ndi eyi kayarugene kositadium. Ame kwato eyi nanivhura kutanta ko kweyi aporofetinga ndi eyi auyunga yimo na kutanta ngoso Kapere, nokutant asi age hena kapi gadiva asi mwene ogu Bushiri yige yilye. Nampili ngano konombudi ndi koTV age kapi gamumpna. Nye Kapere nage katente asi uporofete ndi asi vaporiofete vamwe vatumbura mobibeli. Kumwe nokuhundira asi ava vapura mwaKarunga nomatjangwa vahepa kukwama eyi vana kutanta ndi vakuporofetinga. Kaperer katente asi kwakara ko maruha gatatu gokuvhura kuporofetinga. Umwe wokutunda kosipiritusa uze kosipirutusa simwe, una kara asi mbudi zokwaKarunga zinze komuntu, ano umwe wokuza komuhoko, ano umwe wokuza nye mekoro yimo nye ngoso ana kutanta age. Ano vantu vangoso kapi ava kara nye tavaliganganga pwavene asi age muporofete gononkondo, oyo vahepa nawo vene kuyimona asi kwayivapa. Kapi ngotantera vantu asi ame yinke naweka ndi asi kwakara nomahauto ndi asi kwaeka Yuma. Wahepa kuyirugana nesa nositambo kapisi okare nye asi name ove kuna kulimonekesa kovantu kweyi waweka yimo ana kuatanta Kapere. Gumwe nage kageve mbudi hambara zokulifa kuna kara musita Willem Denhertog mukwatelimo gongereka moNamibia Evangelical Theological Seminar nokutanta asi: ame kapi nina kuliza neyi arugana Bushiri morwa age kauta asi kuvhura kuwapukurura mukaro govantu mosiruwo sosisupi kwange oyo kapi yina kara mouhunga. Denhertog, katente asi vakiliste moNamibia vahepa kuuyunga momunene mukaro ogu vana kara nage omu valisiga meparu, nomamaruhepo gawo. Yipo asi vaporoifete ava wokulitumbura vena wokutunda poyirongo yoponze vahagwana nampili nakauke mpito zokuuuyunga novantu. Yipo asi yina kara mulyo vantu vavatantere asi ngapi twalisiga ntani ngapi omu ayi horoka yokuhamena uporofete yimo ana kutanta ngoso Denhertog, Age katente asi vaporofete owo kugenderera unene, kuhomokera mosirongo mwakara asi eparu ntani moyiwiza mo yawo paeparu. MoEuropa ndi moJapana mwato malikwamo ngangesi. Yitetu kuhoroka nye vaNamibia vahandindira asi ntudi elikwamo lyangesi litunde koMalawi vayavape asi yinke yina kukahoroka. Posiruwo sooso, mukadi gonomvhura 38, katundire koKatima Mulilo, aya mone Bushiri mwene, kahere asi vahepa kuyalimona yipara noyipara nokuyagwana etungiko. Age katente asi kumutara tupu moTV, nye ngesi katokwere kutunda koKatima nositambo asi gahepa kuyamumona mwene Bushiri. Nye kapi kayiyamuhafesere morwa kwato sitetu esi kayamweneko. Kapi kayakandererenge ame, morwa vantu vanzi unene. Age kauhudisire nawa, nokuzigida vantu mombunga nokuvatentera asi yinke yavahorokera meparu lyawo. Nye mukadi ogu kapi katente asi muporofete yinke kahudisire. Ame ninadivara eyi kahudisire yimo ana kutanta mokadi ogu. Murugani ogu azeresa kevango lyaSam Nujoma stadium katente asi age kapi gamona mbunga zokusika rumwe apa, ame kuna yasiki pevango vili zouhambombali, nguranura, nye vantu yipo nina yavagwana kuna pongo. Mokuyitara, vantu kwatameka kuwiza moune, kongurova nye twavatanterere asi yininke nayinye ngayihoroka moutano. Nye vantu kapi kavayipurakenene oyo awo kavakere tupu asi vahepa kuyamundindira vazuvhe mwendi age Muporofete.Siruwo nye oso vana kundindira muporofete vamwe yipo kavatamekere kurada mema gokupongoka nomaholi nye vatungika. Yimo ana kutanta murugani gwina. Nampili ngomu asi vantu wokuvera kapi kayivahafesere, asi awo kapi kavagwene everuro nkenye, age katente asi elikwamo kalikere lyewa lyetungiko ntani vantu kavakere vana hafa. Nomuvero dimwe kaditekere, morwa vantu kavakere tavalipondo vana hara kuhwilira. Vanyu kavawizire poyipundi kumwe nokutengura hena poyipundi yooyo kavawizilire. Apa sayitunga zaNew Era kazikadingwire evano lyongereka ezi zo ECG, moVenduka, mokugwana nkumbu, kavavatanterere asi mupostoli Jimmy Kapinda pwato, nye owo kavakere pevango kapi kavakere asi ngano vauyunge nomukarelipo ogu gwaNew Era, ntani awo kavanyokere kugava nomora zofunguna oku navavhura kugwana Kapinda. 2016-02-04Staff Report 2
