New Era Newspaper

New Era Epaper
Icon Collap
...
Home / Vatungi morundu kuna pumbwa evango lyokuzugumina yihando

Vatungi morundu kuna pumbwa evango lyokuzugumina yihando

2017-12-21  Staff Report 2

Vatungi morundu kuna pumbwa evango lyokuzugumina yihando
John Muyamba Rundu-Mukwatelimo mukurona pamberewa godoropa zaRundu Mathews Naironga, katente asi ndango zodoropa simpe zina kara nositumbukira asi vazerese doropa ntani asi ngapi nava wapukurura nonzira edi dina kara asi kapi dina wapa. Eyi kuna kara unene nomukunda yina gumu, Sauyemwa, Ndama, Kaisosi ntani Kehemu dakara asi yiko vatunga vantu wovanzi. Marukanda aga kapi gakara nononzira dina wapa, kwa kara nonzira domuheke, nsene toziko ne hauto ntudi lyahepa kukara lyokunanakune ndi asi 4*4. Marukanda ogo kapi gakara asi evangoko lyokuzugumina yihando, eyi yina kara asi yiso simwe vana pumbwa ngovatungimo eyi yina kutwaredera asi awo kuzugumanye yihando nkenye apa tupu vana harere, ano vamwe kusima ekero makura tava vhumbike ndi tavahwike yihando yawo. Maruha gamwe gomodoropa kuna kumoneka ngwendi mavango gokuzugumina yihando morwa yihando oyo kuna yizugumine povantu ava vanapilire kudiva asi ngapi omu navarugana noyihando yawo. Vatungimo womodoropa zaRundu, nare vagusa kusivana asi nonzira kapi dina wapa ntani kapi vakara nomavango gomanzi gokuzugumina yihando. Ngesi kuna kara asi nonzira kapi dina wapa ntani yihando nayo kapi ava yidamuna, kapisi komarukanda kwelike nye doropa nazinye, eyi yina kuninkisa asi doropa kapi zina kukura yimo vana kusivana ngoso vatungimo. Moutano nye apa katumupulireko Naironga, katente asi ndango zodoropa kuna kara negano omu vanakara asi ngendeseso zawo zomatjingiso vahepa kuzitjindja yipo zilize nezi zompe kukwama veta vana turapo. Omu ndango vanakuyimona asi awo nava turapo malikwamo gehehedo, yiruganeso ntani egendeso nonzira, ntani vahepa kukeverera ezugumino yihando pomavango nkenye. Ntani magarona gokuzugumina yihando nago gahepa kugaranda ntani yiplastika yina yinakara asi yokutura yihando unene pomambo, ngomu nye yina kara asi eyereko lyosimaliva kwalitulirepo mo 2017/2018 melikwamo lyawo, Naironga yimo nye ngoso ana kutantera sayitunga zaNew Era. “ Age katente asi vahamenimo wovape melikwamo eli, sinkwa ntani kavavadewire modoropa zaKatima Mulilo, kutunda mo 31 July dogoro mo 4 August 2017” omu kavavadewire kukwama veta zompe zina karapo ngesi, ntani awo navanyatera nye omu vana kurugana kehagero lyokwedi kwaAugust 2017. Omu vana kupulisira ndango asi zihehede yirugana ntani noyihepwa ,” yimo ngoso ana kutanta.
2017-12-21  Staff Report 2

Tags: Khomas
Share on social media