Magestalata momhangu yaShakati Jozanne Klazen mEtivali, okwa ya dja oshimaliwa shelifutile mo lopokafimbo kovalumenhu tava tamanekelwa onghendabala yoku kwata onghonga omuluenhu mukwao.
Omundokotola weedula 32 Franky Cloete naBrian Kavungo (30) oo eli omuhongifikola ova pewa keshe a fite oshimaliwa shoN$2000,eshi va holoka lwoshikando shotete momhangu, tava pangulilwa onghendabala yekwatonghonga.
Otaku hokololwa ovalumenhu ava vati vali tava kendabala okukwata keenghono Andreas Nghilifavali (23) oo eli omunafikola koUnam.
Oshiningwanima eshi osha ningwa keengulasha dOsoondaxa mOngwediva pouflata tava ifanwa Joe Archer Villa.
Metivali omo tuu omo, Nghilifavali naye yo okwa holoka momhagu omo a pewa eli futile mo modolongo noshimaliwa shoN$1000. Otaku hokololwa Nghilifavali a kwatwa po Osoondaxa eshi vati naye kwa li ta kendabala okukwata keenghono omukainhu wondhohotola weedula 27. Omukainhu oo eli kaume ile nomukwapata wooCloete naKavungo vati okwali tava nu naye omalodu pamwe novalumenhu ava vatatu mokaflata omo tuu omo.
Mengestalata okwa londwela ovalumenhu ava opo vaha kale mekwatafana ile mekwatafano lopangodi, inava pitikwa okulonga oshilonga oshimbuluma shafafana naashi tava fekelelwa.
Okwa weda po ta ovalumenhu inava pitikwa okuya omakonakono opolifi moshipala.
“Ngeenge ovalumenhu ova dopa okuli ufa komalombwelo oo a tulwa po koveta otava ka kwatwa po kopolifi meendelelo,” Klazen ta ti.
Oshibofa shavo aveshe osha u ndulilwa momafiku 27 July 2022 manga taku ningwa omakonakono.
Omupopiliko wopolifi moshitukulwa Oshana Inspector Thomas Aiyambo okwa hokolola ta ti sheli kolelela komishangwa dopolifi, Nghilifavali okwa shakeneka lwoshikando shotete ooCloete, Kavungo nomukainhu pondingosho imwe opo va pangela oukaume noku tameka tava nine pamwe. Okudja opo ovalumenhu vavali nomukainhu ova lombwela Nghilifavali opo vaye pamwe koflata yomukainhu shaashi oko kwali kuna omalodu omahapu.
Eshi va ya konduda ova tameka tava nu omalodu fiyo okeengulasha.
Okudja opo ovalumenhu vavali ova tameka okudula omunafikola oikutu nokumukwata koilyo yaye yolutu tava ti kutya vati ova hala okuya naye moixulo.
Aiyambo ta ti Nghilifavali o okwa li ta kendala okupendula omukainhu oo kwa li a kofa pefimbo olo, opo e mu yambidide eshi ovalumenhu ovo tave mu kondjifa, ashike omukainhu ina penduka.
Konima yefimbo Nghilifavali okwa pendula oku kufa okaremota kokupatulula omuvelo ndele ta nhuka mo moflata noku faduka po, ndele taka patulula oshibofa positaasi yopolifi yaNgwediva oyo ili popepi nouflata ovo.
Eshi Nghilifavali tadi positaasi novapolifi eke va ulikile poflta opo pa ningilwa oshinima, ye omukainhu naye otai fiki pkopolifi, aka lopote kutya Nghilifavali naye okwa li ta kendabalwa okumu kwatwa onghonga.