Elikwamo lyanguuru lyokudingura nomukunda horowero nadinye domoOshikoto kuna kara simwe somutaro omu sina kuretesapo vadive asi ngapi navagusapo maudigu aga vana kugwanekera nago vatungimo momukunda ogu gwakara asi gumwe vatunga vantu wovawovanzi.
Morwa sitambo nye oso nguuru gomukunda Oshikoto Henock Kankoshi, kakere nomudingu kwedi kuna puko omu katokwere mwene asi takamona vantu nokukavapulisira vakagave maudigu gawo nanayinye eyi vana kumona meparu lyawo. Posiruwo simwe kapi todiva asi vantu udigu musinke vana kara nawo dogoro oka vamone ntani nodiva asi yiyo vana kara nayo eyi.
Mapongo gamwe kani kere nago kaganinkisirenge dogoro asi nizuvhe maudigu gawo nyamwange kwavene, yivhulise omu yakara asi yahepa kupitira monontambo nadinye ano vamwe nompitisili kapi navayakutantera moomu vanakayigwana ndi vana yimono. Yimo ana kutanta Kankoshi.
Age katente asi siruwo esi kasikere sokudingura nomukunda kamwene asi vantu vamwe kwato nombapira ndi asi mafano gosirongo udigu ou gakere pwanare asi kapi gaudiva.
Ano kuhamena nye komafano kanipulire nompitisili kava kerepo asi vantu owo yina gumu vahepa kulitjangesa madina gawo, yipo asi tugatware koministeli zakarerapo yomonda zosirongo. Maudigu gamwe gahepa kugwana ekohonono pangenderera, yimo ana kutanta nguuru. Nayinye oyo vahepa kuyitjanga makura konyima twahepa kutura yitundwamo yipo maudigu gamwe vagagusepo pausimbu yimo ana kugwedako Kankosi.
Age simpe kahundilire ava vana kugwana yirugana vahepa kukuta vantu womomukunda kapisi asi kukareta woponze, siruwo oso vatungimo nawo kuna vagumu unene epiro yirugana, vamwe vana pili yirugana kuna kara vadinkantu vana kara noudivi, owu nava vhura kuruganesa owo vana kugwana yirugana.
Eyi kuvhura nye kuninkisa vapunguli vawize momukunda. Ose kwakara navavadiva yirugana noyiruganeso omu navayiruganesa yimo ana kugwandako ngoso Kankoshi. Age kuna kuhundira asi vantu womonomukunda vahepa kugwana rutjeno yipo asi nawo vakwame elikwamo lyekuliko pontambo zosirongo. Kankoshi katente asi sinzi sovakansela vana kara momukunda gwendi navenye vape yipo nye asi nayigusa siruwo vantu vakamone asi pana wiza malisigo.